ବସନ୍ତରାଣୀ ଆସିଲା
ବସନ୍ତରାଣୀ ଆସିଲା
ବସନ୍ତ ରାଣୀଙ୍କ ପହିଲି ପରଶ
ଧରଣୀକୁ ଯେବେ ଛୁଇଁଲା
ଫୁଲର କୁଞ୍ଜରେ ମହୁଲି ସଞ୍ଜରେ
ଧରା ମହ ମହ ବାସିଲା
ବସନ୍ତ ରାଣୀଟା ଆସିଲା ।
ବଉଳ ବାସିଲା ଲିମ୍ବ ବି ଫୁଟିଲା
ମହମହ ସବୁ ବାସିଲା
ପବନ ଦୋଳିରେ ଫୁଲର ସୁଗନ୍ଧ
ଚତୁର୍ଦିଗେ ମଥା ପିଟିଲା ।
ଆମ୍ର କୁଞ୍ଜରେ ବଉଳ ଦୋଳିରେ
କୋଇଲି ଟା ଯେବେ ଗାଇଲା
ଫୁଲରେ ଫୁଲରେ ବସନ୍ତ ରାଣୀଟା
ସତେ ପ୍ରିତିର ମହୁ କି ଢାଳିଲା ।
ବନେ ଉପବନେ କାନନେ କାନନେ
ଆଶାର ସପନ ଭରିଲା
ପ୍ରେମର ଫଗୁରେ ରଙ୍ଗ ପିଚକାରୀ
ସଭିଙ୍କର ମନ ମୋହିଲା ।
ଗୋଧୂଳି ଲଗ୍ନରେ କୃଷ୍ଣଚୁଡା ରଙ୍ଗ
ପ୍ରାଣରେ ପ୍ରୀତିକୁ ଭରିଲା
ସେ ପ୍ରାଣ ପରଶେ କବି ଲେଖନୀରୁ
ଅମୃତ ପିୟୁଷ ଝରିଲା ।
ପୁରେ ପୁରେ ଭରେ ନବ ଉନ୍ମାଦନା
ମଳୟଟା ଯେବେ ବୋହିଲା
ଦୋଳ ବିମାନରେ ରାଈଦାମୋଦର
ସଭିଙ୍କର ମନ ମୋହିଲା
ବସନ୍ତ ରାଣୀଟା ଆସିଲା ।