ବର୍ଷା

ନବ ଜଳଦର ଆଗମନ ଦେଖି

ହସୁଅଛି ବୃକ୍ଷରାଜି,

ପ୍ରତୀକ୍ଷାର ଅନ୍ତ ଘଟିଅଛି ତାଙ୍କ 

ସବୁ କଷ୍ଟ ଯିବ ଭାଜି ।

 

ଦାରୁଣ ଗ୍ରୀଷମ କବଳରେ ଯେତେ

କରିଥିଲା ହାହାକାର,

ଶୀତଳ ସମୀର ପରଶରେ ସେତେ

ଫୁଟାଉଛି ହସଧାର ।

 

ଜଳଦ ଗର୍ଜନେ ପକ୍ଷୀର କାକଳୀ

ଉଚ୍ଛୁଳି ପଡୁଛି ଯେବେ,

ତରୁଲତାଗଣ ଆସ ବୋଲି ପ୍ରିୟ

ଡାକୁଛି କର-ପଲ୍ଲବେ ।

 

ଝିପିଝିପି ହୋଇ ଅଙ୍ଗରେ ବରଷା

ଯେବେ ପଡୁଅଛି ଖସି,

ପାଦପ କୁଳ ଯେ' ସବୁଜ ରଙ୍ଗରେ

ସଜେଇ ହେଉଛି ହସି ।

 

ପ୍ରିୟ ପାଇ ଯେହ୍ନେ ପ୍ରିୟା ନାଚିଉଠେ

ବହୁତ ଦିନ ଅନ୍ତରେ,

ତେହ୍ନେ ତରୁଲତା ନୃତ୍ୟରେ ମଗନ

ବରଷା ମିତ ସଙ୍ଗରେ ।