ବିହଙ୍ଗ ବିପ୍ଳବ

             ବିହଙ୍ଗ ବିପ୍ଳବ
           ==========
ବହୁଦିନ ତଳ କଥା ଶୁଣ ମନ ଦେଇ l ଆନନ୍ଦ ଲଭିବ ଶୁଣ ଶୁଣି ଏହା ଭାଇ ll ହିମାଳୟ ପାଦ ଭୂମି ଏକ ଜଙ୍ଗଲରେ l ରହୁଥିଲେ ପଶୁପକ୍ଷୀ ଅତି ହରଷରେ ll ଜଙ୍ଗଲର ରାଜାଥିଲେ ସିଂହ ପଶୁପତି l ବିଲୁଆ ମନ୍ତ୍ରୀ ତାଙ୍କର ଭାଲୁ ଦଣ୍ଡପତି ll
ଋତୁ ଚକ୍ର ଘୁରି ବନେ ବସନ୍ତ ଆସିଲା l ହଳଦୀବସନ୍ତ ଏକ ଗଛେ ବସାକଲା ll ବର୍ଷାଋତୁ ଆଗୁ ଦେବ ଡିମ୍ବ ଉଷୁମାଇ l ଛୁଆସବୁ ଉଡ଼ିଯିବେ ଫଡ଼ଫଡ଼ ଭାଇ ll
କିନ୍ତୁ ଭାଇ ଦେଖୁଥିବ କପାଳକୁ ତାର l ହନୁଟିଏ ଭାଙ୍ଗିଲା ତା ଘର ଥର ଥର ll ନେହୁରାହୋଇ ହନୁକୁ ବହୁତ କହିଲା l
ହନୁ କହଇ ଲକ୍ଷଣ ମୋର କୁଦିବୁଲା ll
ସବୁ ପକ୍ଷୀଗଣ ତହୁଁ ଏକତ୍ରିତ ହେଲେ l ପଶୁରାଜଙ୍କ ନିକଟେ ଗୁହାରିକରିଲେ ll ଜଙ୍ଗଲରେ ବସିଗଲା ଏକ ପଶୁ ସଭା l ବିହଙ୍ଗ ଚିନ୍ତନ୍ତି ହନୁଟିକୁ ପାନେଦେବା ll ଭଲ୍ଲୁକ ବସି ଅଛନ୍ତି ନ୍ୟାୟମୂର୍ତ୍ତି ହୋଇ l ଖଗଗଣ ନ୍ୟାୟ ପାଇଁ ରହିଛନ୍ତି ଚାହିଁ ll ଠଉରାନ୍ତି ଦଣ୍ଡ ଧର ଯହୁଁ ହନୁ ଦୋଷୀ l କହନ୍ତି ଜମ୍ବୁକମନ୍ତ୍ରୀ ପାଖେ ତାଙ୍କ ବସି ll
ପ୍ରଭୁ ନ୍ୟାୟଧର ଟିକେ ଆଗପଛ ଚାହିଁ l ବିଚାର କରନ୍ତୁ ଆଉଥରେ ଦୟା ବହି ll ବିଚାର ପତି ଦେଖିଲେ ପଛକୁ ଅନାଇଁ l ପାଚିଲାପଣସ ଏକ ଅଛି ଥୁଆ ହୋଇ ll କହନ୍ତି ଭଲ୍ଳୁକ ତାଙ୍କ ନ୍ୟାୟ ବଦଳାଇ l ହନୁର ପ୍ରବୃତ୍ତି ନିଶ୍ଚେ ଡେଇଁ ବୁଲିବଇଁ ll ହଳଦୀ ବସନ୍ତ କିଆଁ ବସା ତହିଁ କଲା l ଯେଉଁଠି ହନୁ କରଇ ନିତିଦିନ ବୁଲା ll
ଏଣୁ ନଭ ଚର ସର୍ବେ ଯାଅ ନିଜ ଘର l
ହନୁ ସପକ୍ଷରେ ଗଲା ଆଜିର ବିଚାର ll ଲାଞ୍ଚଖାଇ ତୁଳାଧର ଯହୁଁ ପେଞ୍ଚ କଲା l ଚରମଅଶାନ୍ତି ବିହଙ୍ଗମେ ଖେଳିଗଲା ll ବିପ୍ଳବ ରଚିଲେ ସବୁ ଏକଯୁଟ ହୋଇ l ଖୁମ୍ପିଖୁମ୍ପି ପଶୁଗଣ ଦେଲେ ଘଉଡ଼ାଇ ll କାହାଣୀ ନିଷ୍କର୍ଷ ଏହି ମନେ ରଖିଥିବ l ଅବିଧି, ଅନିତି ହେଲେ ବିପ୍ଳବ ଜନ୍ମିବ ll ଭୂକମ୍ପ ହେବ ନିଶ୍ଚୟ ଧରା ଯିବ ଫାଟି l ବିହଙ୍ଗ କହନ୍ତି, ଉଚ୍ଚେ କୁହାଟି କୁହାଟି ll
              🙏🙏🙏
                  ଅର୍ଜୁନୀ
               --------------
ଅର୍ଜୁନୀ ଚରଣ ବେହେରା
ମୋ -୭୬୯୩୦୯୧୯୭୧