ଅନଲାଇନ ଆସର

ସାହିତ୍ୟର ଆଜି 

        ଚାଲିଛି ବେପାର 

          ଭାବ ହୁଏ ବିକା କିଣା, 

ପାନରୁ ଟିକିଏ 

   ଚୂନ ଖସିଗଲେ 

     ସମ୍ପର୍କ ହୁଅଇ ଉଣା l

ଯିଏ ଯେତେ ଦେଲା 

        ଲଫାପାରେ ଭରି 

           ପାଇଗଲା ମାନପତ୍ର, 

ସସମ୍ମାନେ ସିଏ 

   କବି ଉପାଧିରେ 

      ହୁଅନ୍ତି ସେ ଅଭିଷିକ୍ତ l

ହେଉ ପଛେ ଲେଖା 

        ଘାସ କି ପତର 

          ତଥାପି ଶ୍ରେଷ୍ଠ ରେ ଗଣା, 

ନ ଥାଉ ଉପମା 

   ଅଳଙ୍କାର କିଛି 

     ପୂର୍ଣ୍ଣଛେଦ ଅବା କମା l

  ଦୋଷ ଧରିବେନି 

        କାହା ବିପକ୍ଷରେ 

         ରଖିନାହିଁ ମତାମତ, 

ଆଖି ଯା ଦେଖିଲା 

   ଦୁନିଆ ଦାଣ୍ଡରେ 

    ଅପ୍ରିୟ ହେଲେ ବି ସତ l

ମୁଁ ତ ବଣମଲ୍ଲୀ 

       ଅଖ୍ୟାତ ପଲ୍ଲୀର 

          ବଣ ରାଇଜେ ମୋ ଘର, 

ହୃଦୟର ଭାଷା 

  କରଇ ରଚନା 

    ଅନୁଭବ ପ୍ରକୃତିର l

ଭାବନା ରାଇଜେ 

        ଉଡ଼ିବୁଲେ ସଦା 

          ଶବ୍ଦ ପ୍ରଜାପତି ଲୋଭେ, 

ବେପାର ବାଣିଜ୍ୟ 

   ବୁଝେନାହିଁ କିଛି 

     ଭାବ ହିଁ ହୃଦୟେ ଶୋଭେ l

ଲୋଡ଼ା ନାହିଁ ମୋର 

        ତୁମ ମାନପତ୍ର 

         ଅବା କିଛି ପୁରସ୍କାର, 

ପାଠକ ହୃଦୟ 

   ଜିତି ପାରିଗଲେ 

    ଲେଖିବା ସଫଳ ମୋର ।