ଅହିଂସା, ବୀରର ଧର୍ମ

ରଣରଙ୍କ ମାନେ ଧର୍ମ ବୋଲି ଭାବନ୍ତି 

ରାଜ୍ୟ ବିସ୍ତାରକୁ

ଅନ୍ଧତ୍ୱରେ ସେମାନଙ୍କର ନିଷ୍ଠୁରତା 

ଆସେ ତାଙ୍କ ମନକୁ |୧|

ଅହିଂସା ନୁହେଁ କେବେ ହିଂସା ତ ଅଟେ

ପ୍ରତ୍ୟେକ ଭୀରୁର ଧର୍ମ

ଯୁଗେ ଯୁଗେ ଜାଣ ସତ୍ୟ ଓ ଅହିଂସା ସଦା 

ଅଟେ ତ ବୀରର ଧର୍ମ |୨|

ଅବଶ୍ୟ ସଦା କଷ୍ଟ ଅଟେ ସତ୍ୟ ଓ 

ଅହିଂସା ପାଳନର ପଥ

ତାହା କେବଳ ସମ୍ଭବ ଯାହାର ଅଛି 

ସେପରି ଉତ୍ତୁଙ୍ଗ ବ୍ୟକ୍ତିତ୍ୱ |୩|

ଦେଖି ସମାଜରେ ମଣିଷର ଭୋଗୁ ଥିବା 

ସବୁ ଦୁଃଖ ଓ ଯାତନା

ପ୍ରତି ଦରଦୀ ହୃଦୟର ଆସେ ଶୋଷଣ 

କଷଣୁ ମୁକ୍ତି ଦେବାର ଭାବନା |୪|

ଶାନ୍ତି ରକ୍ଷା ପାଇଁ ନିଶ୍ଚିତ ଦରକାର କିଛି 

ମନୁଷ୍ୟର ସମସ୍ତ ଉଦ୍ୟମ 

ମଣିଷର ଧର୍ମ କର୍ତ୍ତବ୍ୟ ନ୍ୟାୟ ପାଇଁ କରି

ଥାଆନ୍ତି ସେମାନେ ସଂଗ୍ରାମ |୫|

 

ଭାରତୀୟ ଇତିହାସରେ ଅଛନ୍ତି ଦୁଇ ଜଣ 

ବିଶ୍ବ ବନ୍ଦିତ ବ୍ୟକ୍ତି

ଅହିଂସାର ପ୍ରତୀକ ବୁଦ୍ଧ ଓ ଗାନ୍ଧୀ ସେହି 

ଦୁଇ ଉତ୍ତୁଙ୍ଗ ବ୍ୟକ୍ତି |୬|

ସେମାନେ ଏକ ସୂତ୍ରରେ ବନ୍ଧା ସେହି 

ସୂତ୍ରଟି ହେଉଛି ଯୋଗିତ୍ୱ  

ଯାହା କେବଳ ହେଉଛି ଅହିଂସା ଓ 

ସତ୍ୟ ଉପରେ ପର୍ଯ୍ୟବସିତ |୭|

ମଣିଷ କିପରି ନିଷ୍ଠୁର ହୋଇପାରେ? 

ଏହି ପ୍ରଶ୍ନର ତାଡ଼ନାରେ  

ରହି ପାରିଲେନି ରାଜକୀୟ ଅବା ଅଳୀକ 

ଐଶ୍ୱର୍ଯ୍ୟ ଲୋଭରେ |୮|

ବୁଦ୍ଧତ୍ୱ ପ୍ରାପ୍ତ କଲେ ସଂକଳ୍ପସ୍ନାତ ପ୍ରଲମ୍ବିତ 

ସାଧନା ବଳରେ

ଦିବ୍ୟଜ୍ଞାନ ଓ କରୁଣାର ମଣିଷ ପାଲଟି ଗଲେ 

ସାରା ଜଗତରେ |୯|

ଗୌତମଙ୍କ ମାର୍ଗ ପ୍ରଦର୍ଶନକୁ ଜଗତେ 

କୁହାଗଲା ବୌଦ୍ଧ ଦର୍ଶନ

ମୋହନ ଦାସ ପ୍ରଚାର କଲେ ଅହିଂସାର

ଶୁଦ୍ଧତା ଜୀବନ ଯାପନ |୧୦|

ଏହି ଦର୍ଶନ ଏକ ବୈଜ୍ଞାନିକ ତତ୍ତ୍ୱ ମୂଳତଃ 

ଆଧାରିତ ଶୁଦ୍ଧତା ଉପରେ 

ଦୁଃଖ ଭୋଗିବାର କାରଣ ହେଉଛି ଅତ୍ୟଧିକ 

ଲୋଭ ବା କାମନାରେ |୧୧|

ଜୀବନରେ ବଞ୍ଚିବା ଅସମ୍ଭବ ନଥିଲେ ମନ

ମଧ୍ୟରେ କିଛି କାମନା ବାସନା

କାମନାର ବିନାଶରେ ଦୁଃଖର ବିନାଶ  

ହୋଇପାରେ ଏକ ଉଦ୍ଭଟ କଳ୍ପନା |୧୨|

ସତ୍ୟ ଓ ଅହିଂସା କେବଳ ବିଶ୍ୱାସ ନୁହେଁ  

ଏହା ଏକ ଜୀବନ ସଂହିତା

ଏହି ବାସ୍ତବତାକୁ ଅନୁଭବ କରି ପାରିବା 

ନିର୍ଦ୍ଧାରଣ କଲେ ସର୍ବନିମ୍ନ ଆବଶ୍ୟକତା |୧୩|

 

ନିର୍ବାଣର ‘ଅଷ୍ଟାଙ୍ଗ ମାର୍ଗ’ ର ପଥ ହେଉଛି 

ଅହିଂସାର ବାଣୀ ଆଧାରରେ 

ବୁଦ୍ଧ ଖଞ୍ଜିଲେ ଏକ ଜାତିବିହୀନ ସମତୁଲ 

ସମାଜ ଗଠନ ଉଦ୍ଦେଶ୍ୟରେ |୧୪|

ଧର୍ମ ନିରପେକ୍ଷତା ଓ ଧର୍ମପ୍ରାଣ ସନ୍ଥର 

ସଚେତନତା ନିର୍ମାଣ ଦ୍ୱାରା

ଅନ୍ୟାୟ ବିରୋଧରେ ସଂଗ୍ରାମ ପାଇଁ ଗାନ୍ଧିଜୀ 

ଦେଲେ ଅସହଯୋଗ ଆନ୍ଦୋଳନ ଡାକରା |୧୫|

ପ୍ରମାଣ ହୋଇଛି ଅହିଂସା କେବେ ଅସ୍ତ୍ର 

ନୁହେଁ ଦୁର୍ବଳ ଅବା ଭୀରୁର

ଅହିଂସା ଏକ ଶାଣଦିଆ ଅସ୍ତ୍ର ଅନ୍ୟାୟ

ବିରୋଧରେ ପ୍ରତ୍ୟେକ ବୀରର |୧୬|