ଆସିବ କି ତୁମେ

ମରା ମରା ଜପି

  ତରିଯାଏ କିଏ

   ମହାକାବ୍ୟ ଯାଏ ରଚି

ରାମ ରାମ ଜପି

  ମୁଁ ଲୁହରେ ଭିଜେ

   କୁହ କିଆଁ ରଘୁପତି 

ସବୁ ଆରମ୍ଭରେ

  ସବୁରି ଅନ୍ତରେ

   ତୁମେ ମୋର ଶ୍ରେଷ୍ଠ ସାକ୍ଷୀ

ହୃଦୟ ଜଳୁଛି

  ଯନ୍ତ୍ରଣା ଜୁଇରେ

   ବ୍ୟାକୁଳିତ ପ୍ରାଣପକ୍ଷୀ 

ତୁମ ପାଦ ସ୍ପର୍ଶେ

  ଅହଲ୍ୟା ପାଷାଣୀ

   ପାଇଗଲା ଜୀବନ୍ୟାସ 

ମୁଁ ଆଜି ପାଷାଣ

  ବିଦଗ୍ଧ ପରାଣ

   କାଳ କରେ ପରିହାସ 

ଆସିବକି ପ୍ରଭୁ

  ଦେବା ପାଇଁ ସାକ୍ଷୀ

   ମୁକ୍ତି ହେବି ଅପବାଦୁ

ଅଳିକ ଜୀବନ

 ବ୍ୟାକୁଳ ପରାଣ

   ଶାନ୍ତ ହେବ ଅବସାଦୁ 

ପାଇ ତୁମ ସ୍ପର୍ଶ

  ହୋଇ ଶାପମୁକ୍ତ

   ଗୁନ୍ଥନ୍ତି ଶବ୍ଦର ହାର

ଜୀବନ ପଥରେ

  ଧରି ତୁମ ହାତ

   ମୋକ୍ଷ ପଥେ ଅଗ୍ରସର