ଆଶ୍ୱାସନା

ଟିକିଏ ଲୁହକୁ ସାଇତିବା ପାଇଁ

ଟିକେ ଆଶ୍ୱାସନା ଲୋଡା

ସେହି ଆଶ୍ୱାସନା ନ ମିଳଇ ଯଦି

ମନ ଦିଏ ପତ୍ରଝଡା।

ଆଶ୍ୱାସନା ଟିକେ ମିଳିଯାଏ ଯେବେ

ଗଜୁରୀ ଉଠଇ ଆଶା

ମନ ବୈତରଣୀ କୂଳଲଙ୍ଘି ଚାଲେ

ବାନ୍ଧିବାକୁ ନୂଆ ବସା ।

ମନ ଖୋଜିବୁଲେ ନୂଆ ମନ ଟିଏ

ସାଇତିବା ପାଇଁ ଲୁହ

ମୁଣ୍ଡ ରଖି ଟିକେ ତା' ଛାତି ଉପରେ

ବାଣ୍ଟିବା ପାଇଁ ନିଜ ଯନ୍ତ୍ରଣା ର କୋହ ।

ଶ୍ୱାସ ହୋଇଯାଏ ଚଇତାଳି ଟିଏ

ବାକି ଜୀବନ ଟା ପାଇଁ

ଉଜୁଡା କ୍ଷେତଟା ସଜାଡିବା ପାଇଁ

ବିଶ୍ୱାସ ଆସେ ଘନେଇ।

ମନ ହୋଇଯାଏ ରାତିର ଉର୍ବଶୀ

ସ୍ୱପ୍ନରେ ସଜେଇ ହୁଏ

ଟିକେ ଆଶ୍ୱାସନା ଏ ଭାଗ୍ୟ ରେଖାକୁ

ସତେ କେତେ ବଦଳାଇ ଦିଏ !!!

ଜୀବନଟା ସିନା ଅଙ୍କା ବଙ୍କା ନଈ

ଅଟକଇ ନାହିଁ କେବେ

ହେଲେ ଛୋଟ ଏକ ଆଶ୍ୱାସନା

ଏହି ହୃଦୟକୁ ବଦଳାଇ ଦିଏ

ସତେ ,କେତେ ଅନୁରାଗେ ।