ଆସ ହେ କେଶବ ବସନ୍ତ ଡାକେ
ଆସ ହେ କେଶବ ବସନ୍ତ ଡାକେ
ଅମୀୟ ଆଭା ରେ ବିଭାମୟ ହୋଇ
ଋତୁ ରାଜ ଆସିଅଛି
ନବପଲ୍ଲବରେ ଧରା ବିମଣ୍ଡିତ
ନୂତନ ଆଶା ଜାଗିଛି ।
ଆମ୍ବ ବଉଳର ଭୁରୁ ଭୁରୁ ବାସ୍ନା
ମନ ମହକାଉ ଅଛି
ହଳଦୀ ବସନ୍ତ ଆମ୍ର କୁଞ୍ଜେ ଦେଖ
ବିଭୋର ଯେ ହେଇଅଛି ।
ପୁଷ୍ପ ମାନଙ୍କର ଭିଡ଼ ଜମି ଅଛି
ଅଳି ଆନନ୍ଦେ ମଗନ
ସତେ କି ଧରଣୀ ପୁଷ୍ପ ଥାଟ ଧରି
କରେ ବସନ୍ତ ବନ୍ଦନ ।
କୋକିଳର କୁହୁ କୁଜନେ ଧରାରେ
ବସନ୍ତ ଯେ ଆସିଅଛି
ମଳୟ ପବନ ସୁଲୁ ସୁଲୁ ବହି
ଶାନ୍ତି ବରଷି ଯାଉଛି ।
ଧରଣୀ ରାଣୀ ତ ସଜେଇ ହୋଇଛି
ଦୋଳ ଯାତରା ଆସୁଛି
ରାଧାରାଣୀ ଦେଖ ସଜ ହେଉଅଛି
କହ୍ନେଇ ଚାହିଁ ବସିଛି ।
ହେ ବ୍ରଜ ବିହାରୀ ରାଧା ମନେହାରୀ
ଧରଣୀ ରାଣୀ ଚାହିଁଛି
ବସନ୍ତ ରାସର ସ୍ନିଗ୍ଧ ଭାବ ପାଇଁ
ଅନାଇ ଯେ ବସିଅଛି ।
ଓହ୍ଲାଇ ଆସ ହେ ଗୋପୀ ମନୋହାରୀ
ବସନ୍ତ ଶୋଭା ମଣ୍ଡପେ
ପ୍ରେମ ପରିଭାଷା ବୁଝାଇ ଦିଅ ହେ
ଏହି ମାନବ ସମୀପେ ।
ଦେହୁ ଦେହାତୀତ ଅନନ୍ତ ପବିତ୍ର
ତ୍ୟାଗେ ଭରା ଯେଉଁ ପ୍ରେମ
ସେଇ ପ୍ରେମ ଧାରା ବୁହାଇ ଦିଅ ହେ
ଶାନ୍ତ କାନ୍ତ ହେଉ ମନ ।
ବସନ୍ତ ରାଜ ଯେ ଥାଟ ସଜାଇଛି
ସୌନ୍ଦର୍ଯ୍ୟରେ ଭରା ଧରା
ପୁଷ୍ପ ମାନଙ୍କର ଭିଡ଼ ଜମିଲେଣି
ଆସ ନନ୍ଦର ଦୁଲ୍ଲାରା ।
ଧରା ସୁନିର୍ମଳ ଶୀତଳ ସମୀର
ଦେହକୁ ଶାନ୍ତି ଦେଉଛି
ଶ୍ରୀରାଧାଙ୍କୁ ସଙ୍ଗେ ନେଇ ଚାଲିଆସ
ମନେ ଉଚ୍ଛ୍ଵାସ ଜାଗୁଛି ।
ବସନ୍ତେ ସୁଶାନ୍ତ ପ୍ରୀତି ଗଙ୍ଗା ଶ୍ୟାମ
ବୁହାଇ ଦେଇ ହେ ଯାଅ
ଏ ଜଗତ ହେଉ ଉଜ୍ଜୀବିତ ପୁଣି
ଜୀବନୀ ଶକ୍ତି ହେ ଦିଅ ।
ବସନ୍ତେ କେଶବ ସଜ ହୋଇ ଆସ
ରାଧାରାଣୀ କୁ ଯେ ଆଣ
ଝୁଲଣା ରେ ଝୁଲି ବଇଁଶୀ ବଜାଇ
ପ୍ରତି ମନ ପ୍ରାଣ ଜିଣ ।
ତୁମରି ହସର ରହସ୍ୟର କଥା
ପ୍ରତି କାନେ କହିଦିଅ
ବସନ୍ତ ଝୁଲାରେ ଝୁଲି ଝୁଲି ତୁମେ
ପ୍ରୀତିର ଗଙ୍ଗା ବୁହାଅ ।
ବସନ୍ତ ବଗିଚା ସଜାଇ ହୋଇଛି
ତୁମ ଆଗମନ ପାଇଁ
କୋଇଲି ଗାଉଛି ପଞ୍ଚମ ତାନରେ
ତୁମ ଦରଶନ ପାଇଁ ।
ଆସ ଗିରିଧାରୀ ସୁଦର୍ଶନ ଧାରୀ
ବସନ୍ତ ରାଜ ଡାକୁଛି
ଧରଣୀ ରାଣୀ ଯେ ଚାହିଁ ବସିଅଛି
ଆସ ହେ ତୁମେ ମୁରାରୀ ।
ଆସ ହେ କେଶବ ବସନ୍ତ ଡାକୁଛି
ରସମୟ ହେଉ ଧରା
ବଂଶୀର ସୁରରେ ପୋଛି ହୋଇଯାଉ
ଜଗତୁ ପାପର ଧାରା ।