वारी चालली पंढरी

वारी चालली पंढरी

अनवाणी वारकरी |

माऊलीच्या भेटीसाठी

भक्तीभावे कास धरी ||१||

वारी चालली पंढरी

करी विठूचा गजर |

वाटेतील दिंडीवर

राही विठूची नजर ||२||

वारी चालली पंढरी

हाती घेवुनिया टाळ |

झांज मृदंग वाजती

गळा तुळशीची माळ ||३||

वारी चालली पंढरी

नाचुनिया तालावर |

घेवुनिया आनंदाने

तुळशीला डोईवर ||४||

वारी चालली पंढरी

अश्व नाचे रिंगणात |

नेत्र पारणे फिटती

भरे आनंद उरात ||५||

वारी चालली पंढरी

होई भेटीचा उमंग |

वाहे भक्तीचा तरंग

होती वारकरी दंग ||६||

वारी चालली पंढरी

मुख विठूचे पहाया |

भिमातटी राही संगे

उभा माझा विठुराया ||७||

वारी चालली पंढरी

संगे चाले गोवर्धन |

पंढरीत आनंदाने

होई विठूचे दर्शन ||८||