सल
सल
रिते सूर माझे कुणाही न कळले,
तुला शोधताना पुन्हा ते न जुळले ।
विसावा नको हा अता ह्या वनीचा;
सुगावा मिळेना जिथे जानकीचा,
कुण्या काजव्याच्या प्रकाशात जळले ।
रिते सूर माझे कुणाहीन कळले ।।
कुटीतून जेव्हा तुझा सूर विरला,
तुझ्या स्पंदनांचा खुळा नाद स्मरला;
तुझ्या आठवांनी जुने शब्द गळले ।
रिते सूर माझे कुणाहीन कळले ।।
उन्हाला कळावी वियोगार्त झळ ती,
विधीने दिलेली क्षणार्धात कळ जी,
कळे ना कळे का असे चित्र मळले ।
रिते सूर माझे कुणाही न कळले ।