राहून गेलंय...

काही बोलायचं राहून गेलंय 

काही सांगायचं राहून गेलंय

उद्याचा विचार करता करता 

जगणं आजचं हरवून गेलंय   

विचारांच्या अथांग जगात     

शब्दांना आज उधाण आलंय     

वाहून जाईल सारं त्यात, म्हणून     

जगणं आजचं हरवून गेलंय 

घ्यायला हवं भावनेला समजून

द्यायला हवं त्यांनाही उमलू

साठवण सारी करता करता 

जगणं आजचं हरवून गेलंय 

जिवंतपणीच करावे जगण्याचे सोहळे  

ऋतू एकांती असाच मावळे  

क्षण बरसत जाता जाता   

जगणं आजचं हरवून गेलंय