प्रेम बंधनाच्या गाठी

बालपण     आठवले

दारी   पाऊस  पाहून |

स्वप्न   पाहत  बसलो

बालपणी त्या जाऊन ||१||

ढग    गर्जुनी   नभात

सर  आली  पावसाची |

खेळण्यास पाण्यामध्ये

नाव  केली  कागदाची ||२||

नावे   मध्ये   बसविले

एक  राजाराणी जोड़ी |

हाती दिली लाल छत्री

नाव  चाले आड़ीमोड़ी ||३||

दिले  होते सोबतीला

रम्य   गवताचे   फुल |

निळ्याशार  पावसात

होतो  खेळण्यात गुल ||४||

राजाराणी जोड़ी वाटे

होती आमचीच कृती |

पहावया  गोड  स्वप्ने

सोबतीला ही प्रकृती ||५||

रस्ता दाखवी तू मला

नाव पुढे जाण्यासाठी |

देई  साथ  जोडूनिया

प्रेम  बंधनाच्या गाठी ||६||