पण माणूस बरा भला होता..!

झाली होती गर्दी कुणाच्या मौतीची

एकजण सांगत होता मोठ्या बात्या सौतीची

कुठे हशा पिकला होता

कुठे घसा सुकला होता

पण माणूस बरा भला होता

आला होता अंतेला

घेऊन घरून घाई

पोरं रडत होती कुठे घेऊ सई

रडल्या रडल्या मेल्यागत झाली होती बाई

पण गर्दी कशाची कळल्यागत कळेना

कधी तरी भेटले होते पाहुणे एकमेकांना

रात्री बसणार होते दुःखात

झिंगणार होते मद्यात

हा खरच शोक होता की शौक

तो गेला होता

पण माणूस बरा भला होता..!