पावसाला विनंती

कितीही विनंती केली तरी पाऊस नाही यायचा

पाऊस येत नाही म्हणून

दोष कोणाला द्यायचा

मी विचार करतो

अर्धा तुकडा जमिनीचा 

देवाच्या नावे करायचा 

देवाकडून आता पाऊसच विकत घ्यायचा

दरवर्षी हवामानाचा 

अंदाज चुकतो

पंढरपुरच्या विठोबाला साकडं घालतो

होम-हवन करूनही पाऊस येत नाही

बळी देऊनही 

देव प्रसन्न होत नाही

तारीख पे तारीख पाऊस

पुढे सरकत असतो

देव पाण्यात बुडवूनही

पाऊस येत नसतो

कितीही नतमस्तक झालात तरी

पाऊस ऐकायचा नाही

ये रे ये रे म्हटलं तरी यायचा नाही

पाऊस वेळेत नाही आला तरी राग धरतात

अवकाळी आला तर भरपाई मागतात

मुसळधार आल्यावर

सारेकाही वाहून जाते

वादळ वाऱ्यात बरेच

नुकसान होते

पिकले नाही तर रड रड असते

उत्पन्न घटले की मर मर असते

पावसाचा कोप आता सहन करायचा

भजन कीर्तन करूनही पाऊस नाही यायचा

आरक्षण मागायला बरीच गर्दी दिसते

आंदोलन मोर्चाला किती मोठी लाईन असते

याच गर्दीने एक एक झाड लावले तर

पाऊस कधीच रूसणार नाही

एकही शेतकरी गळ्याला

फास लावणार नाही

पाऊस बरसला की वसुंधरा हसेल

झरे झिरव्यात तलाव तळव्यात

पाणी वाहताना दिसेल

तेव्हा फुकटाचा पाऊस आहे

आता आडवून ठेवायचा

थेंब थेंब पाण्याचा मातीत

जिरवायचा