पाऊस असाही

गडगड होता नभात ढगांची

विजेची लख्ख चकमक झाली

झोपडीतल्या गरीब माणसांची

झोप पहिल्या पावसाने उडाली

फाटक्या संसाराची जोडलेली

रंगबिरंगी ठिगळं चिध्यांची काही

आभाळातील इंद्रधनुष्य ते सुंदर

पाहून फारसे त्यास सुखावत नाही

कोसळतो पाऊस धरतीवरती

पावसाने वनचरे जरी तृप्त केली

गळत्या छपराने डोळे पाणावती

गरीबाची झोपडी मात्र नदी झाली

जगण्याचा प्रश्न येतो ठायी ठायी

प्रत्येक पावसात हीच अवस्था होई

उध्वस्त संसाराचे चटके सोसताना

भिजलेले अंग अंग जाळीत जाई