पाऊस असा पाऊस तसा

पाऊस कोसळधार

नुसताच धो धो कोसळणारा

चाकरमान्यांची तारांबळ उडवणारा !

पाऊस रिमझिम

ओलेचिंब भिजवणारा

सर्वांना रोमॅन्टिक बनवणारा !

पाऊस धमकावणारा

विजांच्या गडगडाटात

नुसतेच चार थेंब शिंपडणारा !

पाऊस रीप रीप

गरमागरम चहा भज्यांची

आठवण करून देणारा !

पाऊस ढगफुटीचा

नावानेच घाम फोडणारा

गावही गिळंकृत करणारा !

पाऊस मुसळधार

महापुराचे थैमान घालणारा

घर संसार उध्वस्त करणारा !

पाऊस न बरसणारा

दुष्काळ अवर्षण घडवणारा

अश्रूंच्या धारा बरसवणारा !

पाऊस सखा-सोयरा

अश्रूत मिसळून जाणारा

दुःखात सहभागी होणारा !!

पाऊस मृगसरींचा

मातीचा सुगंध दरवळवणारा

स्वप्नांचे अंकुर फुलविणारा !

पाऊस तहान भागवणारा

तृषार्त जमिनीला तृप्त करणारा

हिरवा शालू नेसवणारा !!