मुलगी वाचवा

दुर्गा गौरी लक्ष्मी सह

कन्या शक्तिरूप खरी

जग बघू द्या लेकीला

नका संपवू उदरी..||

नका मानू कन्यारत्ना

तुम्ही परक्यांचं धन

लळा लावूनी तुम्हास

तीच जिंकेल हो मन..||

कर्तृत्वान उजळू दया

चराचर, दाही दिशा

गोड भावाच्या राखीची

नका संपवू हो आशा..||

ज्याच्या पोटी ये मुलगी

तोच खरा भाग्यवान

झेप घेई ती आकाशी

वाढे घराण्याचा मान..||

हर एक क्षेत्रामध्ये

मुली आता अग्रेसर

नका विसरु हो तिचा

जगण्याचा अधिकार..||

ऐका ऐका जग सारे

साद मुलगी वाचवा

भविष्यात जन्मासाठी

कूस आईची वाचवा..||