मृदगंध पावसाचा
मृदगंध पावसाचा
(वर्ण संख्या :- १६, यती - ८)
चिंब पावसानं रानं, झालं ओलं प्रत्यक्षात |
आनंदाने भिजलो मी, पहिल्याच पावसात ||धृ||
सुर्य दिसेनासा झाला, आज भरल्या दुपारी |
चहुकडे अचानक, नभ अंधारला भारी ||
मग बरसले ढग, धाऊ लागले नभात |
आनंदाने भिजलो मी, पहिल्याच पावसात ||१||
माळ तुटावी मोत्यांची, तशी आली सर खाली |
वृक्ष, पाने, फुले, यांची, आंघोळच चिंब झाली ||
थेंब थेंब पावसाने, थंडी भरली अंगात |
आनंदाने भिजलो मी, पहिल्याच पावसात ||२||
पहिल्याच पावसाची, ओढ प्रत्येकाला राही |
वाट चातका सारखी, शेतकरी सुध्दा पाही ||
सगळेच वाट याची, निरखून बघतात |
आनंदाने भिजलो मी, पहिल्याच पावसात ||३||
पावसाळा म्हटला की, येतो डोळ्याच्या समोर |
कांदाभजी आणि चहा, खाती लहान नि थोर ||
मुले मुली सगळेच, आनंदाने नाचतात |
आनंदाने भिजलो मी, पहिल्याच पावसात ||४||
पावसाच्या थेंबामुळे, आज अवनी भिजली |
आनंदाने चोहीकडे, सृष्टि नटून सजली ||
मृदगंध पावसाचा, भरे या आसमंतात |
आनंदाने भिजलो मी, पहिल्याच पावसात ||५||