मौनामध्ये बोलू आपण

जगावेगळी अबोल भाषा 

सुरेल होतील यापुढचे क्षण 

मौनामध्ये बोलू आपण 

मौनामध्ये बोलू आपण ||१||

शब्दांमध्ये कुठली क्षमता 

दोन मने संवाद साधता 

ठेवू धजती दोघां बांधुन

मौनामध्ये बोलू आपण ||२||

असली कसली उदासीनता 

आतुरता तरीही निष्क्रियता 

व्यक्त व्हायचे वाटे बंधन 

मौनामध्ये बोलू आपण  ||३||

बरेच काही उसळे आतून 

शब्दांतुन ना ये साकारुन

कसे ठेवणे मनात दाबुन 

मौनामध्ये बोलू आपण  ||४||

कुणी न काही केले तरीही 

बरेच काही झाले कारण 

काय जाहले कसे जाहले 

तनामनाचा पुसतो कणकण ||५||

शस्त्रकर्म ते रक्तहीन, पण 

करणे आहे आवश्यक पण.

अग्निपरीक्षेतच दोघेजण 

मौनामध्ये बोलू आपण ||६||