माय मराठी

माझ्या मराठीची शान

द-याखो-या ग सांगते !

बोल मराठीचे श्लोक

तुका,ज्ञानोबा बोलते...!!

माझ्या कवितेला साज

शब्द मराठी लावते !

बोल मराठीचे थेट

काळजाला हो भिडते....!!

माझी बहिणाई,जनी

ओवी जात्यावर गाते !

धमन्याधमन्यातही 

माय मराठी वाहते....!!

ओवी, भारूड, पोवाडा

साजश्रृंगारही घेते !

बोल बोबडेही बाळं

शब्द मराठीच येते....!!

बोल किर्तनाचे रंगी

साज मराठी लावते !

बोल मराठीचे मृदू

नित्य मनाला भावते....!!

गीत,गझल, सुंदर

शब्द झंकार मांडते

शिवशंभू संस्कारीत

शब्दमोती हे सांडते....!!

माझ्या मराठीची शान

दाहीदिशा नित्य गाजे !

माझ्या मराठीचा डंका

सा-या जगात हो वाजे....!!