माझा बाप
माझा बाप
बाप वटवृक्षाची शितल छाया
काटेरी फणसाचा मऊमऊ गर
सदनाचा पाया परिवाराची ढाल
असा राही उभा पाठीशी खंबीर
नित्य दिनरात राबून राबून
उन्ह पावसातही करे चाकरी
भुकेल्या पोटा आम्हा चारल्या
चिंब घामाने भिजल्या भाकरी
घेऊन खांद्यावर टिकास फावडे
पहाटेस माती कामावर जाय
चार कोस चालूनिया अनवाणी
रक्तबंबाळ होई भेगाळले पाय
स्वप्नांचा महाल बांधूनी उरात
दावियली विद्या मंदिराची वाट
शिणलेला देह गृही आल्यावर
सांजवातीस घेई अभ्यास पाठ
सकल वेदनांचे काहूर साठवी
अंतरी बाप माझा अपुल्या पोटी
लेकरांच्या सुखा झिजवून काया
जगी बाळ केली किर्तीवान मोठी
श्रीफळाच्या डोलावाणी पिता
असे त्याची आम्हा पाठीवर थाप
हे परमेश्वरा तुज मागणे एक
असा लाभावा जन्मोजन्मी बाप