कौतुकाची थाप

कधीतरी द्यावी । कौतुकाची थाप ।

उल्हास अमाप । मिळे जणू ।।

भरभरूनही । करावे कौतुक ।

कधी सहेतुक । पुढच्याला ।।

कौतुकाचे बोल । भिडे काळजाला ।

उर्जा माणसाला । मिळतेच ।।

कंजूस मनाचा । नुसतेच पाही ।

जळतच राही । वृत्ती त्याची ।।

कळेल का कधी । भाव हो मनाचे ।

शब्द अंतरीचे । असतात ।।

कविता कधीही । नसते कविता ।

असे आत्मियता । कवीचीच ।।

बोल ह्रदयीचे । घ्यावे जरा ध्यानी ।

नको मनमानी । स्वत:चीच ।।

शाब्दीक कौतुक । करावेत कधी ।

माणुसकी साधी । दाखवावी।।

जळणारे झाले । एकमेकांवरी ।।

लोकं नानापरी । कळतात ।।

सोडून द्या ना हो । तुझी हेकेखोरी ।

भरते तिजोरी । एकदाची ।।

मनातून द्यावी । कौतुकाची थाप ।

सुख आपोआप । मिळेल हो...।।