झोरा (पोवारी कविता)

लहानपनमा अजी

धरशान हातमा झोरा

दुकान लका आन

नविन कपडा मोरा ……||१||

 

नविन कपडा देखशान

खुशी होय मनमा 

टाकशान देखु कपडा

पयले आपलो तनमा ….||२||

 

मामाजी आन झोरामा

चिवळा अना लाळू

मायला चिपकेव रव्ह

खानला आमरो बाळू ….||३||

 

शाळा जाजन धरशान

पाटी पुस्तकको झोरा

सब टुराईनको सामने

अभ्यासमा मोरो तोरा ….||४||

 

भाजीपाला आन माय

धरस्यार झोरामा हाट 

बजारको खाजोलाई

देखजन आमी बाट ……||५||

 

झोरा धरस्यार पिवळो

पोस्टमेन जब आव

बाट देखजन चिठ्ठीकी

आवाज दे सबका नाव …||६||

 

उपयोगी असो झोरा

जास्त नाहाय दामला

फाटजाये तरी आवसे

झाडूपोछाको कामला ….||७||