हरवलेली माणुसकी
हरवलेली माणुसकी
गर्दीत माणसाच्या एकटी मी
माणूस शोधते आहे
मुखवट्यामागे लपलेल्या चेहऱ्यामध्ये
माणुसकी लोपते आहे
संवेदना मिटली वेदना हरवली
दुःखात इतरांच्या माणुसकी
आज बिभत्स हसते आहे
एक तुपाशी एक उपाशी जगतो
तरीही अन्नपूर्णा इथे
शांत निवांत झोपते आहे
कुणाची तृष्णा अन कुणाची वासना
नजरेत वासनेच्या स्त्रीचा
आदर शोधते आहे
गर्दीत माणसाच्या .......
धावपळ किती ती पैशांसाठी
कुणी उरलेच नाही कुणासाठी
आधार देण्या शब्दांचा
शब्द विकत घेते आहे
कुणाचे खाण्याचे वांदे
कुणाचे पांढरपेशे काळे धंदे
रडण्यास इथे उसंत नाही
अंतयात्रेस आता नाही खांदे
नात्यांच्या हरवलेल्या गोतावळ्यात
जिव्हाळा शोधते आहे
आपुलकी विरली माणुसकी हरली
गर्दीत माणसाच्या एकटी मी माणूस शोधते आहे