दुःखाचा सोहळा

           

इथं कुणब्याच्या भाळी,

आहे दुःखाचा सोहळा ||धृ||

मातीच्या उदरातून, इथं उगवलं सोनं 

येई पीक धावून, जाई व्यापारी घेऊन 

होई कुणब्याची होळी, व्यापाऱ्यांचा पोळा ||१||

घामाच्या थेंबाथेंबातून उगवे पिकाचा कोंब

इथं लाखमोलाचा रं, होय एक-एक ठोंब 

किती पिकलं तरी, हाती राही पाचोळा ||२||

कष्टाचं रं फार काम, अंगातून गळे घाम

पोरं रानावनातूनी, फिरतीरं अनवानी 

तिफणीच्या मागं त्यांची, पेरणीची शाळा ||३||

संसार फाटका अन्, व्याजाचा रं तडा

भेगाळलं मन सारं, बुजवीरं बापडा 

रिकामीरं ओंजळ, भरलेला डोळा ||४||

इथं कुणब्याच्या भाळी .......