🚩શૈશવમાં છલકેલ શોર્ય💪

શૈશવકાળમાં હું પાંચમાં ધોરણમાં અભ્યાસ કરતો. મિત્રોની સાથે રમતો, ભુતોની વાતો કરતા ડરતો,નિશાળે એકલા જતાં ડરતો. નિશાળે જતાં વચમાં એક ખડકીવાળું ઘર આવતું ત્યાં મારા જેવડા છોકરાએ મારી સામે જોઈ હાથ ઉગામ્યો હું ડરીને ઉભો રહી ગયો. તો દોડીને આવી મને ગડદો મારી ખડકીમાં પેસી ગયો. હું તો ચુપચાપ ઘરે ગયો કોઇને કહ્યું પણ નહીં. આમ હવે તો રોજ નીકળું ત્યારે પેલો છોકરો મને મારતો.

એકવાર મારા કાકાશ્રી જે આગેવાન હતાં તેમને આ વાત કોઇકે જણાવી. તેમણે મને પ્રેમથી બાજુમાં બેસાડી કહ્યું , "જો બેટા આ ડર તારા મનમાં પેઠો છે એટલે તું ડરે છે. હજી તું નાનો છે પણ રાજપુત છે. આપણે તો દેશની રક્ષા કરવાની હોય અને ડરીને રક્ષા કેમ કરી શકાય ?"

"તો હવે શું કરવું કાકા ?" મેં ખચકાતા પુછ્યું

કાકાશ્રીએ કહ્યુ , "જો પહેલાં તારી અંદરના ડરને ભગાવવાનો એટલે તુ કદી ડરશે નહીં. હવે તું જ્યારે સ્કુલમાં જાય ત્યારે હું દુર બેસીને જોઇશ. તારે તે છોકરાને બરાબર મારવાનો"

વાત મને સમજાઇ. મારા જીવનની સોનેરી પ્રભાત તે દિવસે ઉગી. સવારે નક્કી કર્યું આજે જીતવું જ છે. તૈયાર થઇ યુધ્ધમાં સાત કોઠા વિંધવા જતાં અભિમન્યુની જેમ છાતી ફુલાવી નીકળ્યો. પેલી સમરભુમી જેવી ખડકી આવતાં જ થોડો ફફડાટ થયો કાકાશ્રીને દુર બેઠેલ જોઇ હિંમત વધી.

એ સમરભુમી પાસે જેવો પહોંચ્યો. પેલો છોકરો મને જોઇ ખડકી ખોલી દોડયો મને મારવા. જેવો તે મારી પાસે મારવા આવ્યો કે તરત જ મેં દફતર ફેરવીને તેને માર્યુ. અચાનક અણધાર્યા હુમલાથી તે પડી ગયો. મારું સાહસ ખુબ વધી ગયું.  પછી દફતર મુકી ગડદા પાટુથી એવો માર્યો કે બુમાબુમ કરતાં તેના બાપાએ આવીને છોડાવ્યો.

અને કાકાએ શાબાશી આપી કહ્યું,"બોલ હવે ડર પણ ભાગી ગયો ને ?

"મજબુત ઇરાદાની કદી હાર નથી થતી.

સાહસ કર્યાં વગર સિધ્ધી પ્રાપ્ત નથી થતી."

શૈશવનાં આ સંસ્મરણો મને આજેય મુસીબતમાં હિંમત આપે છે. વિજ્યના દ્વાર ખોલી આપે છે.