અંતર મંતર વિજ્ઞાન જંતર - 3

દૃશ્ય-૪

(આઠેય બાળકો જંગલના રસ્તે આગળ વધે છે. બધા પાસે ખભે ટીંગાડેલ થેલા છે અને તેમાં કાંઈક ને કાંઈક લીધેલું છે. મજાક-મસ્તી કરતા જાય છે. કમલ ખિસ્સામાંથી કાઢીને કંઈક ખાધા કરે છે. તેનું મોઢું ખાવા માટે ચાલુ જ રહે છે.)

કાનો :  જુઓ, કોઈએ ડરવું નહિ અને કયાંય ઉતાવળ કરવી નહિ.

કમલ : શું ડરવું નહિ ! વાઘ આવીને ઊભો રહી જાય તો મામો ન થાય.

સાવન : એ ભાઈ ! જંગલમાં ઘૂસ્યા ત્યાં વાઘની વાતો શું કરે છે ?

બકુલ : માળું આ જોખમ તો કે'વાય હો !

કાનો :  કંઈક જાણવા માટે જોખમ પણ કરવું પડે. જોખમ કરે એ જ જીતે છે.

કમલ : તને ડાહી ડાહી વાતો આવડે. અમારું છટકી જાય એનું શું ?

કાનો :  હિંમત હોય તો ડરને ભગાડવાનો રસ્તો મળી જાય. કોઈએ હિંમત ન કરી હોત તો વિજ્ઞાનની કોઈ શોધ થઈ ન હોત.

(ત્યાં જ કોઈ ગર્જના જેવો અવાજ આવે છે. કમલ કાનાને ચોટી જાય છે.)

કમલ : લે, હવે બતાવ હિંમત ! મામો આવ્યો લાગે છે.

કાનો :  કાંઈ નથી. બીકણફોશી ન બન !

સંજય : બનવાનું કયાં છે ? છે જ...

બકુલ : હોવે હો. કમલિયાને દોરીમાંય સાપ દેખાય.

કમલ : એમ કાંઈ બીકણ નથી હો ! ઈ તો...

વિજય : ઈ તો બીવાય જાય છે એમ જ ને ?

અજય : ખોટી વાતો બંધ કરીને આગળ હાલોને !

દૃશ્ય-પ

(બાળકો થોડે આગળ ચાલ્યા ત્યાં એક કાંટાળું ઝાડું આવે છે. બંને બાજુ દૂર સુધી નજર કરી. પણ કયાંય રસ્તો દેખાયો નહિ. સૌ વિચારમાં પડી ગયા.)

કમલ : રસ્તો બંધ છે. હાલો પાછા ઘરે !

ગોકુલ : આપણે કાંઈ પાછા જવા નથી આવ્યા !

સંજય : (ચીસ પાડીને) ઈ શું કહેશ ? શું બીજાની જેમ આપણું પણ આવી બનશે !

કાનો :  અરે ભાઈ, નિરાંત રાખો. હમણા કાંઈક રસ્તો નીકળી જશે. (કાનાએ બૂમ પાડી) ભેરુબંધ રોબોટ.... !

સાવન : આ વળી તારો કયો ભેરુબંધ છે ?

કાનો :  હમણા આવી જશે.

(રોબોટ ઊડતો-ઊડતો આવે છે. બધાનું ધ્યાન એ બાજુ પડે છે.)

 (ક્રમશ: )