જામનગરનું પૂર
જામનગરનું પૂર
સપના ! તારી આંખો જાણે જામનગરનું પૂર,
અમે હોબ્બેસ તણાયા છેક વચ્ચોવચ્ચ દરિયે !
સપના ! તારા શ્વાસે ટપકે પંચવટી ચોપાસ,
અમે તો હેય તણાયા મઘમઘતી ઘૂઘરિયે !
પવનચક્કીનો પવન સમયસર વા'ય,
અને જો તમે ઉડો આકાશ
લઇ જાજો રે કાગળ સખીયન !
પંચેશ્વરનો પડઘો જો પડઘાય
અચાનક શ્રી બાલાહનુમાન આપણા થાય
લઇ જાજો રે શ્રીફળ સખીયન !
સપના ! તારા રણજિત રસ્તે નાગમતીનું ગામ
અમે તો એય તણાયા નાગમતીને તળિયે !
સપના ! તારી આંખો જાણે જામનગરનું પૂર,
અમે હોબ્બેસ તણાયા છેક વચ્ચોવચ્ચ દરિયે !
થાક ચડે તો મૂકો હવાઈ ચોક
અને ચાલો રે ઠેઠ નગરમાં
જ્યાં છે અનરાધારી હૈયાનો વરસાદ !
લાલબંગલેથી નીકળતા લોક તને જો પૂછે
તો તું રસ્તા સાત બતાવી કહેશે પરીકથા એકાદ !
સપના ! તારી આંગળિયુંમાં કલરવતો મનમોર
અમે બિન્દાસ્ત તણાયા જામનગરના ફળિયે !
સપના ! તારી આંખો જાણે જામનગરનું પૂર
અમે હોબ્બેસ તણાયા છેક વચ્ચોવચ્ચ દરિયે !