આ વરસાદમાં

ઉમટે છે મનમાં સંસ્મરણો અગાધ, આ વરસાદમાં,

મન મોરલો દેતો કોઈને સાદ, આ વરસાદમાં,

નથી વરસતું એકલું આકાશ,

નયનેથી પણ નીતરે છે નીર, આ વરસાદમાં,

મનડે ઘેરાયો યાદોનો ગોરંભો,

આંસુ વહી નીકળ્યાં તોડી પાળ, આ વરસાદમાં,

 

વેદનાનો ડૂમો અટક્યો’તો ગળે, 

તેને પણ મળી ગઈ આંસુઓની ભાળ, આ વરસાદમાં,

ચેતજો, બે કાંઠે વહે છે વ્યથાની નદી,

સઘળું તણાઈ જશે એની તાણે, આ વરસાદમાં,

ભીની આંખો ભલે વહે અવિરત,

વસમી છે વહાવવી પ્રિયની યાદ, આ વરસાદમાં,

તન હો તર-બ-તર વર્ષાનાં વારિથી,

પણ મનડું નહીં ભીંજાય, આ વરસાદમાં,

છો વરસી ખૂટી પડતાં સાતેય સાગર,

વહેશે અખૂટ અશ્રુ-ધાર, આ વરસાદમાં.