ଅନୁରୋଧ
ଅନୁରୋଧ
ବିଜୟ କୁମାର ପାଢ଼ୀ
ନିତ୍ୟ ଯାନ୍ତି ଯାତାୟତ ଯାନବାହନରେ
କାହାପ୍ରତି ଲବେ ଦୟା ନ ଥାଏ ମନରେ
ଛୋଟପିଲା ବୃଦ୍ଧ ବୃଦ୍ଧା ଗର୍ଭିଣୀ ରମଣୀ
ବସିବା ପାଇଁ କି ଟିକେ ଜାଗା ପାଆନ୍ତିନି l
କେହି ଗର୍ଭବତୀ ନାରୀ ଦେଇ ତା ଛୁଆକୁ
କେ ଯାଏ ଚିକିତ୍ସାଳୟ କେ ଫେରେ ଗୃହକୁ
ଅନେକେ ଅସୁବିଧାରେ ଠିଆ ହୋଇ ଯାଆନ୍ତି
ବହୁ ଅୟସରେ କିଛି ଲୋକ ବସିଥାନ୍ତି l
ସଭିଏଁ ଦେଖନ୍ତି ଏହି କରୁଣ ଅବସ୍ଥା
ତଥାପି କେ କରନ୍ତିନି ତାହାରି ବ୍ୟବସ୍ଥା
ମହିଳା ସୁରକ୍ଷା ଲାଗି ଆମ ସରକାର
ସୁନ୍ଦର ଯୋଜନା କଲେ ଅନେକ ପ୍ରକାର l
ହେଲେବି ମହିଳା ଏଠି ନୁହେଁ ସୁରକ୍ଷିତ
ସବୁ କ୍ଷେତ୍ରେ ନାରୀମାନେ ହୁଅନ୍ତି ଉପେକ୍ଷିତ
ଏମନ୍ତ ହୋଇଲେ ଦେବା ଦେବୀ ହେବେ ରୁଷ୍ଟ
ନିଶ୍ଚୟ ଘଟିବ ଦିନେ ଅନର୍ଥ ଅନିଷ୍ଟ l
ତେଣୁ ସାଧୁ ସୁଧିଜନେ ଏହି ମୋ ସନ୍ଦେଶ
ଆପେ ବଦଳିଲେ ଦିନେ ବଦଳିବ ଦେଶ
ଦେଇଥିଲେ ପାଇ ପୁଣି ବୁଣିଥିଲେ ଦାଇ
ଏହି ଛୋଟ ଅନୁରୋଧ ରଖ ମୋର ଭାଇ l