ଧକ୍କା ଓ ଧୋକା

ଜୀବନ ଯାତ୍ରାରେ ଚାଲୁ ଚାଲୁ କେବେ

କେଉଁ ଠାରେ ହୁଏ ଧକ୍କା ,

ଧକ୍କା ଖାଇ ପୁଣି ଆଗକୁ ଚାଲିବା

ପାଇ ଗୋଟେ ନୂଆ ଶିକ୍ଷା ।

ଦୁର୍ଘଟଣା ହେଲେ କ୍ଷତି ତ ହୋଇବ

ଦେହରେ ବି ହୁଏ କ୍ଷତ ,

ଧକ୍କା ଠାରୁ ବେଶି ଧୋକା କରେ କ୍ଷତି

ଏ କଥା ନିରାଟ ସତ ।

ଦେହରୁ ତ କ୍ଷତ ଧୀରେ ଧୀରେ ଶୁଖେ

ମନରୁ ପାରେନା ଶୁଖି ,

ଧୋକାରୁ ସେ କ୍ଷତ ହୁଏ ଯାହା ସୃଷ୍ଟି

ଦେଖେ ନାହିଁ ସିନା ଆଖି ।

ଅଜାଣତେ ହୁଏ ଧକ୍କା କାହା ସଙ୍ଗେ

ଜାଣି ଶୁଣି ହୁଏ ଧୋକା ,

ଧୋକା ଦିଅ ନାହିଁ କାହାରିକୁ କେବେ

ମନାନ୍ତର ହେବ ପକ୍କା ।

ଧକ୍କା ହୋଇ ଯଦି ଜୀବନ ପଳାଏ

ଥରଟିଏ ହୁଏ ମୃତ୍ୟୁ ,

ଧୋକା ଦେଲେ ମୃତ୍ୟୁ ଆସେ ବାରମ୍ବାର

ଆସୁଛି ଯେମିତି ଋତୁ ।

ଧକ୍କା ହେଲା ପରେ ସମୟ ସ୍ରୋତରେ

ବନ୍ଧୁତାରେ ହୁଏ ଯୋଡ଼ି ,

ଧୋକା ଦେଲେ ବନ୍ଧୁ ଆଉ ନ ଚାହିଁବ

ଚାଲିଯିବ ମୁହଁ ମୋଡ଼ି ।।