ରକ୍ତ

ଥରୁଟିଏ ଜଣେ ସାଙ୍ଗର ମା'ଙ୍କ ଅପରେସନ ବେଳେ ରକ୍ତ ଦେବା ଛଡା , ଆଉ କେବେ ରକ୍ତ କାଢିନଥିଲି । ଆଜି ଲାଗ ଲାଗ୍ ଦୁଇ ସିରିଞ୍ଜ୍ କାଢି ନେଲାବେଳେ ଭାବିଲି , ଏ ରକ୍ତ ର ରଙ୍ଗ କେଡେ ଗାଢ଼ ସତେ !!! କେତେ ସହଜରେ କାଢି ବି ହୁଏ !!!

ଆମ ଛୋଟ ସହରର ବଡ ପ୍ୟାଥୋଲାବ୍ ଆଗରେ ଘଡିଏ ଛିଡା ହେବା ପରେ ମୋ' ନମ୍ବର ଆସିଲା ।

ମୁଁ କିନ୍ତୁ ଏବେ ଗପୁଛି , ମୋ' ଠିକ୍ ଆଗରେ ଥିବା ଦମ୍ପତିଙ୍କ ବାବଦରେ ।

ଆମ ଅଞ୍ଚଳରେ ସରକାର ଟାଣିଥିବା ଦରିଦ୍ର ରେଖା ତଳେ , ସତୁରୀ ଭାଗ ଲୋକ ଏଯାବତ ଅଛନ୍ତି । ରୋଗ ବୈରାଗ୍ୟ କିନ୍ତୁ ଧନୀ ଗରିବ ନିର୍ବିଶେଷରେ ଆସେ ପାତର ଅନ୍ତର ନକରି ।

ଯା'ବି ହେଉ , ଲୋକଟାର ଚିଠା ଦେଖି , ସେ ରକ୍ତ ଶୋଷା ଟେକ୍ନିସିଆନ୍ ବାପୁଡା ବଲବଲ ହୋଇ ଚାହିଁଲା ଖାଲି । କହିଲା -

- ଏତକକୁ ଆଠଶ' (!) ଲାଗିବ । ଅଛି???

ମୁଁ ଚମକିଲି । ସେମାନଙ୍କ ଅବସ୍ଥା ଯା' ହେଉଥିବ । ଟେଷ୍ଟକୁ ଏତେ , ପୁଣି ଔଷଧ ଆଉ ଡାକ୍ତର ଖର୍ଚ୍ଚ ???

ମୁହଁ ତଳକୁ କରି ପଦାକୁ ବାହାରିଗଲେ ଦୁହେଁ । ତେଣୁ ମୋ' ପାଳି ଆସିଲା ଏଥର । ଚଁ ଚଁ କରି ଚୁଇଁ ନେଇଗଲା ସିରିଞ୍ଜିଏ ।

- ଦେଢଶ' ଜମା କରନ୍ତୁ । ଦି'ଘଣ୍ଟା ଛାଡି ଆସନ୍ତୁ ।

- ଓକେ ।

ଫେରିବାବେଳେ ନଜର ପଡିଲା କାନ୍ଥରେ ଟଙ୍ଗା ରେଟ୍ ଚାର୍ଟ ଉପରେ । କେଉଠିବି ଆଠଶ' ଦର ନଥିଲା । ଦମ୍ପତି ଦୁହେଁ ଚାଲିଯାଇଥିଲେ କିନ୍ତୁ ସେତବେଳକୁ ।

…….

ଠିକ୍ ଦୁଇଘଣ୍ଟା ପରେ ଆଉଥରେ ଗଲାରୁ , ସଂଯୋଗକୁ ମୋଓରି ଆଗରେ ସେଇ ଦମ୍ପତି ! ଯନ୍ତ୍ରଣା , ସଞ୍ଚୟର ମେରି ଖୁଣ୍ଟ ଦୋହଲାଇଦିଏ । ଆଠଶ' କେଉଠୁ କେମିତି ଯୋଗାଡି , ଲୋକଟା ଟେକ୍ନିସିଆନ୍ ହାତକୁ ବଢାଇ ଦେଲାପରେ , ଛୁଞ୍ଚି ଫୋଡିଲା ସେ , ସ୍ତ୍ରୀ ଲୋକଟାର ଶିରାଳ ହାତରେ । ଠାଏ ଠାଏ କରି ଚାରି ପାଞ୍ଚ ଥର ଫୋଡିଲା ପରେ ବି ସିରିଞ୍ଜ୍ କୁ ଠୋପାଏ ରକ୍ତ ଆସୁନଥିଲା । ନୟାନ୍ତ ହୋଇ ଟେକ୍ନିସିଆନ୍ ବାପୁଡା କହିଲା -

- ଦେହରେ ଠୋପାଏ ରକ୍ତ ନାହିଁ? ବଞ୍ଚିଛୁ କେମିତି ?

ମୋ' ପାଟିରୁ ଛାଏଁ ବାହାରିଗଲା -

- ଆସିବ କୁଆଡୁ???

…….

କାଲି ଅଗଷ୍ଟ ପନ୍ଦର । ଚମତ୍କାରଟେ ହୁଅନ୍ତାନି ?

ଶାସନ ମୁଖ୍ୟ ତ୍ରିରଙ୍ଗା ତଳେ , ଘୋଷଣା କରନ୍ତେ -

- ସମସ୍ତ ଡାକ୍ତରୀ ଖର୍ଚ୍ଚ, ଲୋବୋରେଟାରୀ ଟେଷ୍ଟ ଖର୍ଚ୍ଚ, ପ୍ରାଇଭେଟ୍ ଡାକ୍ତରଙ୍କ ଫିସ୍, ମାତ୍ର ଶହେଟଙ୍କା ରେ ବାଧ୍ୟତାମୂଳକ ସୀମିତ ହୋଇ ରହିବ । ଯା'ସବୁ କ୍ଷୟକ୍ଷତି ହେବ, ସେସବୁ ସରକାର ବହନ କରିବେ ।

ଅନ୍ତତଃ ପ୍ରିୟ ରାଜ୍ୟବାସୀଙ୍କ ସ୍ଵାସ୍ଥ୍ୟ ସୁରକ୍ଷା ଖାତିର୍ ରେ ......

ବି ଦ୍ର : ଗପନୁହେଁ । କେବଳ ଚିନ୍ତନ ମାତ୍ର ।