ସୁନ୍ଦର

ଦୂରକୁ ସୁନ୍ଦର ଉଚ୍ଚ ପରବତ

ପାଖକୁ ସୁନ୍ଦର କଇଁ

ରାତି ପାହିଗଲେ ସକାଳ ସୁନ୍ଦର

ସୂରୁଯ ଆସିଲେ ଉଇଁ ।

ଆହୁରି ସୁନ୍ଦର ଦୂରୁ ଦେଖିଦେଲେ

ସୋରିଷ ଫୁଲର କ୍ଷେତ

ସୁନ୍ଦର ଲାଗଇ ଆମ୍ବ ଗଛ ଡାଳେ

କୋଇଲି ଗାଇଲେ ଗୀତ ।

ଜହ୍ନ ତାରା ଥିଲେ ଆକାଶ ସୁନ୍ଦର

ଘାସକୁ କାକର ଟୋପା

ଗହଣାରେ ସଜା ବୋହୂଟି ସୁନ୍ଦର

ମୁହଁକୁ ଚନ୍ଦନ ଟିପା ।

ଅଗଣା ସୁନ୍ଦର ଚଉରାଟି ଥିଲେ

ପଡିଥିଲେ ସେଠି ଝୋଟି

ଛୋଟ କୁଡିଆଟି ସୁନ୍ଦର ଲାଗଇ

ଲିପା ହୋଇଥିଲେ ମାଟି ।

ଦରିଆ ସୁନ୍ଦର ଢେଉ ମାଳ ମାଳ

ନଈକୁ ସୁନ୍ଦର ନାଆ

ଟିକି ଓଠେ ଟିକି ହସଟି ସୁନ୍ଦର

ଶିଶୁକୁ ସୁନ୍ଦର ମାଆ ।

ମାଟି କୋଳେ ପରା ଗଛଟି ସୁନ୍ଦର

ଫୁଲ ଫଳ ଥିଲେ ଭରା

ଆହୁରି ସୁନ୍ଦର ଦେଖାଯାଉ ଥାଏ

ପଡିଲେ ସକାଳ ଖରା ।

ପ୍ରକାଶ କୁମାର ଚାନ୍ଦ ,ଜୟପୁର ଶାସନ ପିପିଲି ପୁରୀ

ମୋ୯୮୫୩୫୪୯୩୮