ଶେଷ ନିଷ୍ପତ୍ତିରେ ଗଡିଲା ରଥ

 

  

  ଶେଷ ନିଷ୍ପତ୍ତିରେ ଗଡିଲା ରଥ

  ବିନା ଭକ୍ତେ ହେଲା ଗୁଣ୍ଡିଚା ଯାତ।

  ସେବକ ଟାଣିଲେ ରଥକୁ ଯାଇ

  କଟକଣା ଥିଲା ସଭିଙ୍କ ପାଇଁ ।

  ମହାପ୍ରଭୁଙ୍କର ସବୁତ ମାୟା

  ମୋ ପାଇଁ କରିଲେ ଅସୀମ ଦୟା ।

  ରଥଯାତ୍ରାର ଏ ଅପୂର୍ବ ଲୀଳା

 ଦୂରଦର୍ଶନ ତ ପ୍ରସାର କଲା ।

 ଦୂରଦର୍ଶନ ଓ ଦିଅଁଙ୍କ ପାଇଁ

 ଭକ୍ତ ଶୂନ୍ୟ ଯାତ ଦେଖିଲି ମୁହିଁ ।

 ମହାପ୍ରଭୁ ମୋତେ ସୁଯୋଗ ଦେଲେ

 ଦୟା ବରଷି ସେ ଶ୍ରୀକ୍ଷେତ୍ରେ ନେଲେ ।

 ସ୍ନାନ ପୂର୍ଣ୍ଣିମାରେ ଯାଇ ମୁଁ ଥିଲି

 ଗୁଣ୍ଡିଚାରୁ ପୁଣି ସେବା କରିଲି ।

 ଯାତ ଦିନ ଯେଉଁ ଦାଣ୍ଡ ଉଛୁଳେ

  ଭଜନ କୀର୍ତ୍ତନ ଉଦଣ୍ଡ ତାଳେ,

 ଲାଗୁଥିଲା ସେହି ଦାଣ୍ଡତ ଖାଲି

 ପ୍ରଭୁ ଯାଉଥିଲେ ରଥରେ ଝୁଲି ।

 ପ୍ରଶାସକ ଆଉ ଆରକ୍ଷୀ ମିଶି

 ଦୂରୁ ନିୟନ୍ତ୍ରଣ କରିଲେ ବସି ।

 ଆଷାଢୁଆ ଖରା ତତଲା ଭାରି

 ସେବକଙ୍କୁ ଦେଲା ହାଲିଆ କରି ।

 ଘଣ୍ଟାକ ଆଗରୁ ରଥ ତିନୋଟି

 ଶରଧାବାଲିରେ ଗଲେ ପହଞ୍ଚି ।

 ଗୁଣ୍ଡିଚା ବାସି ତ ଆଡପ ବିଜେ

 ଗୋଟି ପହଣ୍ଡିରେ ପ୍ରଭୁ ଗଲେ ଯେ ।

 ଆଡପ ମଣ୍ଡପେ ପ୍ରବୃତ୍ତ ରାସ

 କାଳିଆ ଅଧରେ ଅବୁଝା ହସ ।  

 ହେରାପଞ୍ଚମୀ ରେ ଲକ୍ଷ୍ମୀଙ୍କ ଲିଳା

 ପାଖେ ଦେଖି ନେତ୍ର ପବିତ୍ର ହେଲା ।

 ସପ୍ତମୀ ରେ ରଥ ଦକ୍ଷିଣ ମୋଡ

 ନଥିଲେ ଭକତ ନଥିଲା ଭିଡ ।

 ବାହୁଡାରେ ପ୍ରଭୁ ଆସିଲେ ଫେରି

 ରଥେ ଦେଖି ଆଖି ଗଲାମୋ ପୂରି ।

 ପ୍ରଭୁ ହେଲେ ଯେବେ ସୁବର୍ଣ୍ଣ ବେଶ

 ସେ ରୂପକୁ ଦେଖି ମନ ହରସ ।

 ନଥିଲା ଗହଳି ନଥିଲା ଭିଡ

 ଖୁସିରେ ପ୍ରଭୁଙ୍କୁ ଦେଖିଲା ମୁଢ ।

 ସୁନାବେଶ ବାସୀ ଅଧରପଣା

 ଅଶରିରୀ ସବୁ ହୋଇଲେ ବଣା ।

 ଶେଷରେ ପ୍ରଭୁଙ୍କ ନୀଳାଦ୍ରୀ ବିଜେ

 ଭାବ ଭକତିରେ ପରାଣ ଭିଜେ ।

 ଏସନ ରଥକୁ ହେବନି ଭୁଲି

 ପ୍ରତ୍ୟକ୍ଷ ଦର୍ଶନେ ଧନ୍ୟ ମୁଁ ହେଲି।

 ଶେଷ ନିଷ୍ପତ୍ତିରେ ହୋଇଲା ଯାତ

 ସାର୍ଥକ ହେଲା ମୋ ଜୀବନ ପଥ ।