ନିଦର ସମ୍ପର୍କ ସପନ ସାଥେ

ନିଦର ସମ୍ପର୍କ ସପନ ସାଥିରେ

ମନ ଏକା ପାରେ ବୁଝି

କେତେବେଳେ ଖୁସି କେବେ ଲୁହ ନେସି

ଆଖି କୋଣେ ଯାଏ ହଜି ।

ସପନ ବୁଝେନି ଦିନ ଅବା ରାତି 

ନିଦ ସାଥେ ସେ ତ ମିତ

ନିଦୁଆ ଆଖିରେ ପରଶ ମାଖି ସେ

ଗାଉଥାଏ ନୂଆ ଗୀତ ।

କେତେବେଳେ ରାଗ ଶିବରଞ୍ଜନୀ ସେ

କେତେବେଳେ ରାଗ ଚୋଖି 

ଆଖିରେ ହୁଏନି ଦେଖି ସିନା ତାକୁ

ହୃଦୟରେ ହୁଏ ଲେଖି ।

ବହଳ ନିଦକୁ ମିଠା ସପନ ତ 

ଆହୁରି ବହଳ କରେ

ରାତି ସରିଯାଏ ସପନ ସରେନି

ଅଜଣା ପୁଲକ ଭରେ ।

ମନ୍ଦ ସପନର ଗପ ନସରୁଣୁ

ଭାଙ୍ଗିଯାଏ ଗାଢ ନିଦ

ନିଦ ଭାଙ୍ଗିଗଲେ ଆଶଙ୍କା ଆତଙ୍କେ

ଟଳମଳ ହୁଏ ପାଦ ।

ଯାହା ସବୁ କେବେ ନୁହଁଇ ସମ୍ଭବ

ଦିବା ସପନଟି ସେହି

ମିଛଟାରେ ସିଏ ମନକୁ ଝୁମାଏ

ଅନେକ ଯାତନା ଦେଇ ।

ଜୀବନରେ ଯଦି ସପନ ନଥାଏ

ଆଗକୁ ହୁଏନି ବଢି

ସପନ ଯୋଗାଏ ଉତ୍ସାହ, ଯିବାକୁ

ବିକାଶର ସିଡ଼ି ଚଢି।