ମୋ ଗାଆଁରେ ସଞ୍ଜ

ପାହାଡ଼ ପଛେ ଲୁଚିଲେ ଯାଇ

ସୂରୁଯ ଦେବ ବେଗେ

ଗୋଠକୁ ନେଇ ଘରକୁ ଫେରେ

ଗାଈଆଳଟି ଆଗେ। ।

ପକ୍ଷୀଟି ଫେରେ ବସାକୁ ତାର

ହୋଇଲେ ସଂଜ ପରା

କେଡ଼େ ସୁନ୍ଦର ସଂଜ ଆକାଶେ

ଦିଶେ ସଂଜୁଆ ତାରା ।

ହସେ କେତକୀ ହସେ ମାଳତୀ

ହସେ ରଙ୍ଗଣୀ ଫୁଲ

ଗହୀରୁ ଫେରେ ଦନେଇ କାକା

ଫିଟେଇ ତାର ହଳ ।

ଚଉରା ମୂଳେ ବୋଉ ଦିଅଇ

ସଂଜ ବତୀକୁ ଜାଳି

ପୁରାଣ ପଢେ ନିଧିଆ ନନା

ଗଡେଇ ଜପା ମାଳି ।

ଗହଳି ଶୁଭେ ଚାହାଳି ଆଡୁ

ପିଲାଙ୍କ ପାଠ ଘୋଷା

ସନା ଗୁରୁଜୀ ବେତ ପାହାର

ତା ସାଥେ ଅଙ୍କକଷା। ।

ଦାଣ୍ଡପିଣ୍ଡାରେ ବୁଢ଼ା ବୁଢ଼ୀଙ୍କ

ଗପ ଆସର ଜମେ

ଘର ଭିତରେ ଧିଆନେ ଥାଏ

ମାଆତା ନିଜ କାମେ ।

ପାହାଡ଼ ପାଣି ବିଷ ଅମୄତ

ଚାଲେ ପିଲାଙ୍କ ଖେଳ

ଗାଆଁ ଦାଣ୍ଡଟା ପଡଇ ଫାଟି

ଶୁଭଇ କୋଳାହଳ। ।

ବେଳ ବୁଡ଼ିଲେ କିଆଗୋହୀରୁ

ବିଲୁଆ ରଡି ଛାଡେ

ମାଛି ଅନ୍ଧାରେ ବାହୁଙ୍ଗା ତଳୁ

ଜହ୍ନଟି ମୁହଁ କାଢେ ।

ପ୍ରକାଶ କୁମାର ଚାନ୍ଦ ଜୟପୁର ଶାସନ ପିପିଲି ପୁରୀ

ମୋ.୯୮୫୩୩୫୪୯୩୮.୭୦୦୮୯୨୫୯୫୪