କ୍ଷିତିକି ଭିତ୍ତି ହେଲା ପ୍ରବଳ

   କ୍ଷିତିକି ଭିତ୍ତି ହେଲା ପ୍ରବଳ

  ଯଉତୁକ ପାଇଁ ଜଳାଇ ଜାୟାକୁ

   ପତି ପାଲଟୁଛି ଧନ କାଙ୍ଗାଳ

   କ୍ଷିତିକି ଭିତ୍ତି ହେଲା ପ୍ରବଳ...।

    ପେଟରୁ ଭୃଣକୁ କରି ଚିହ୍ନଟ

    କନ୍ୟା ଭୃଣକୁତ କରନ୍ତି ନଷ୍ଟ

    ପୁଅଟିଏ ପାଇଁ ମାଆର ରକତେ

    ପରିବାର ଲୋକେ ଖେଳନ୍ତି ଖେଳ

     କ୍ଷିତିକି ଭିତ୍ତି ହେଲା ପ୍ରବଳ...।

     ଝିଅବୋହୂଙ୍କର ଇଜ୍ଜତ ଲୁଟି

     ଥୋକାଏ ଚାଲନ୍ତି ଫୁଲେଇ ଛାତି

    ନିଜ ମାଆ ନିଜ ଭଉଣୀଙ୍କ କଥା

     ଭାବିବାକୁ ତାଙ୍କ ନଥାଏ ବେଳ

      କ୍ଷିତିକି ଭିତ୍ତି ହେଲା ପ୍ରବଳ...।

     ଗାଁଆରୁ ସହର ଭାସୁଛି ନିଶା

     ନିଶା ପାଇଁ ଦେଖ ନାରୀଙ୍କ ଦଶା

   ଘରଲୋକ ହେଲେ ମଦୁଆ ମାତାଲ

      ଘରଣୀଙ୍କ ଏଣେ ଫାଟେ କପାଳ

      କ୍ଷିତିକି ଭିତ୍ତି ହେଲା ପ୍ରବଳ....।

     ସୁରକ୍ଷିତ ଯହିଁ ନୁହଁଇ ନାରୀ

     ଅସୁରକ୍ଷିତ ତ ପେଟରୁ ପରୀ

    ଚାଲିବନି ଅଖ ଗଡିବନି ଚକ  

     ଅମା ଅନ୍ଧକାର ହେବ ବହଳ

     କ୍ଷିତିକି ଭିତ୍ତି ହେଲା ପ୍ରବଳ ....।