କର୍ତ୍ତବ୍ୟ
କର୍ତ୍ତବ୍ୟ
ଭାରତୀୟ ବୋଲି ଗରବ କରୁଛେ
ଜୀବନକୁ ଆମ ମଣୁଛେ ଧନ୍ୟ
ଅଧିକାର ପ୍ରତି ସଚେତନ ହୋଇ
କର୍ତ୍ତବ୍ୟ ପ୍ରତି ତ ଦେଉନୁ ଧ୍ୟାନ ।
ଚଉକି ପାଇଁକି ଚଉକି ଟାଣୁଛୁ
ପର ସୁଖ ଆମେ ପାରୁନୁ ସହି
ପର ପଇସା ରେ ତେଲ କିଣି ଆମେ
ଦୀପ ଜାଳୁ ଆମ ମଙ୍ଗଳ ପାଇଁ ।
ସରକାରୀ ଜାଗା ମାଡି ବସି ଆମେ
ନିଶରେ ଆମର ମାରୁଛୁ ତେଲ
ସରକାରୀ ମାଲ୍ ଦରିଆକି ଡାଲ୍
ମାରିମୁରି ଆମେ କରୁ ବୋବାଲ୍ ।
ଚାକିରୀ କରିଲେ ଉପୁରି ଖୋଜୁଛୁ
ରାଜନୀତି କଲେ ମାଗୁଛୁ ବଟି
ମହୁକା ମିଳଲେ ଠାକୁର ଖାଇତ
ଖଟୁଲିକୁ ଆମେ ଦେଉଛୁ ଚାଟି ।
ଆମର କେଉଁଠି ଉଣା ହୋଇଗଲେ
ବନ୍ଦ ଧର୍ମଘଟ ରାସ୍ତାକୁ ରୋକୁ
ବିଚାରା ନିରୀହ ଲୋକଙ୍କ ହିନସ୍ତା
ଖିଲିଖିଲି ହସି ଆମେତ ଦେଖୁ ।
ସ୍ଵଚ୍ଛ ଭାରତର କାହାଣୀ ବଖାଣୁ
ଘର ଆଗେ ଆମ ମଇଳା ଗଦା
ପରିବେଶ ପାଇଁ କୁମ୍ଭୀର କାନ୍ଦଣା
ବଣ ଜଙ୍ଗଲକୁ କରୁଛୁ ପଦା ।
ନିଜ କର୍ତ୍ତବ୍ୟରେ ହେଳା କରେ ଯିଏ
ଆଜି ନହେଲେ ବି କାଲି ସେ କାନ୍ଦେ
ଚକି ଗୁଡ ଯାଏ କହୁଣୀକୁ ବହି
ତୁଛାଟାରେ ନିଜ ଭାଗ୍ୟକୁ ନିନ୍ଦେ ।