କରୋଣା ଓଅନ୍ ଲାଇନ୍ ପାଠ

 କରୋଣା ଡରରେ ପାଠଶାଳା ସବୁ

  ଦେଶ ସାରା ବନ୍ଦ ରହିଛି

  କେଜି ଠାରୁ ଏବେ ପିଜି ଯାଏ ନିତି

  ଅନ୍ ଲାଇନ୍ ପଢା ଚାଲିଛି ।

  ମୋବାଇଲ ଧରି ପିଲାମାନେ ସବୁ

  ସକାଳରୁ ସଞ୍ଜ ବସନ୍ତି

  ବୁଝନ୍ତୁ କି ଅବା ନ ବୁଝନ୍ତୁ ପାଠ

  ଅନ୍ ଲାଇନ୍ ପାଠ ପଢନ୍ତି ।

  ମୋବାଇଲ କରେ ଆଖିକୁ ଖରାପ

  ଯେଉଁ ବାପା ମାଆ କୁହନ୍ତି

  ସେହି ବାପା ମାଆ ପିଲାଙ୍କୁ ତ ଏବେ

  ଦାମି ମୋବାଇଲ ଦିଅନ୍ତି ।

  ମୋବାଇଲରେ ସିନା କାର୍ଟୁନର ମଜା

  ପାଠରେ କି ମନ ଲାଗୁଛି

  ଚପଳମତିଙ୍କ ପାଦ ଟଳମଳ

  ସ୍କୁଲ ଖାଲି ମନେ ପଡୁଛି ।

  ସହରୀ ଶିଶୁଙ୍କ ଅସୁବିଧା ନାହିଁ

  ନେଟ୍ ତ ସବୁଠି ମିଳୁଛି

  ଗାଁ ପିଲାଙ୍କ ତ ମୁଣ୍ଡବଥା ବେଶି

  ସିଗ୍ନାଲ ବାଧକ ହେଉଛି ।

  ସବୁ ଗାଆଁରେ ତ ଟାୱାର ନାହିଁ ବୋଲି

  ସିଗ୍ନାଲ ସହଜେ ମିଳୁନି

  କେମିତି ପଢିବେ ପିଲାମାନେ ପାଠ

  କରୋଣା ସେକଥା ବୁଝୁନି ।

  ରାତି ପାହୁପାହୁ ପିଲାଏ ଖୋଜନ୍ତି

  ସିଗ୍ନାଲ ମିଳିବା ଜାଗାଟି

  ଉଚ୍ଚା ଯାଗା ଦେଖି ମୋବାଇଲ ଖୋଲି

  ଅନ୍ ଲାଇନ୍ ପାଠ ପଢନ୍ତି ।

  ଗଛ ଉପରେ କି ପାହାଡ ଶିଖରେ

  ପିଲା ମାନେ ଭିଡ କରନ୍ତି

 ବିପଦକୁ ପିଲେ ଖାତର ନକରି

 ଗୁରୁଙ୍କଠୁ ପାଠ ବୁଝନ୍ତି ।  

 

 କରୋଣା ଦାଉରେ ହନ୍ତସନ୍ତ ପିଲା

 ପାଠ ତ ପଛେଇ ଯାଉଛି

  ଅନ୍ ଲାଇନ୍ ପାଠ କଅଁଳ କଳିଙ୍କୁ

 ସତେକି ସହଜେ ଛୁଉଁଛି !