କୋରୋନା ଓପାର୍ବଣ ଋତୁ

  ବିଘ୍ନ ବିନାଶନ ପ୍ରଭୁ ଗଜାନନ

  ଆଦ୍ୟପୂଜ୍ୟ ଗଣଈଶ

  ତାଙ୍କରି ପୂଜାରୁ ପାର୍ବଣର ଋତୁ

  ଛୁଇଁ ଯାଏ ଦଶ ଦିଶ ।

  କନ୍ୟାସଂକ୍ରାନ୍ତିରେ ବିଶ୍ୱକର୍ମା ପୂଜା

  ଆଶ୍ଵିନରେ ଦଶହରା

  କୁମାର ପୂର୍ଣ୍ଣିମା ଲକ୍ଷ୍ମୀ ଆବାହନେ

  ମୁଖରିତ ହୁଏ ଧରା ।

  ଦୀପାବଳି ରାତି ଦୀପଜାଳି ସାଥୀ

  ମହାକାଳୀଙ୍କର ପୂଜା

  କାର୍ତ୍ତିକେଶ୍ୱରଙ୍କ ଭଷାଣୀରେ ହୁଏ

  ପାର୍ବଣର ଶେଷ ମଜା ।

  ଏସନ ପାର୍ବଣେ ନାହିଁତ ପୁଲକ  

  କୋରୋନା ସାଧୁଛି ଦାଉ

  ପୂଜା ହେବନାହିଁ ସଜ୍ଜା ହେବ ନାହିଁ  

  ଗହଳି ହେବନି ଆଉ ।

  ମଣ୍ଡପେ ହେବନି ଗଣେଶଙ୍କ ପୂଜା

  ଘରେତ ପାରିବ ପୂଜି

  ପ୍ରଭୁଙ୍କ ଭଜନ ପ୍ରଭୁଙ୍କ କୀର୍ତ୍ତନ

  ଭାବ ଭକତିରେ ହଜି ।

  ଜାକଜମକରେ ଦଶରା ହେବନି

  ଦେବୀ ଦୁର୍ଗାଙ୍କର ପୂଜା

  ବାଜା ବାଜିବନି ମେଲୋଡି ହେବନି

  ମଣ୍ଡପ ହେବନି ସଜ୍ଜା ।

  ପରମ୍ପରା ରଖି ଆଉ ସବୁ ପୂଜା

  ଅଳପେ ଅଳପେ ହେବ

  ପାର୍ବଣର ଋତୁ କରୋନା କୋପରେ

  ବାଟବଣା ହୋଇଯିବ ।