କେନ୍ ନ ଲୁକି ରହେଲା

କାହି ଗଲା ସେ ନାକର ଗୁନା

ବେକର୍ ଖଗଲା ଟାଆଁଣ ବାହା ସୂତା

ଆଇ ବୁଢୀର କଁରାଟ୍,

କେନ୍ ମସାନ କୁଦାନ ପଡିଛେ

କି କେନ୍ ମାହାଜନର ବାକସ୍ ଥୀ

ଲୁଗିଛେ ।

ନାଇ ବାହାରତା ଘାଏ

ବେକେ କାନେ ଅଁଟେହାତେ

ଖଞ୍ଝି ହେତା

ମନ୍ ଟିକେ ହାଏ ଲାଗତା

ଛାଡି ଜାଏତା ଉରଘା ବଥା ।।

କାହି ଗଲାସେ ଢୁଲିଆ ଖୁସା

ଗୁରୁର, ତିତେର, ଚଁପା

ଗାଏ ବଲଦ୍ ପୁସା ।

କାହିଗଲା ସେ ହୁମୋ ବଉଲି

ଝୋର୍, ଗୁଡୁ ଆରୁ କେଲି

ନାଇ ଆଏତା ଘାଏ ।

ହଁସାତା ମନ୍ ମୁହିତ

ଫେର ଘାଏ ପଛେ ପଲା

କାହିଗଲା ସେ ଘରର୍ ଚଁଟିଆ କୁଆ

ଆରୁ ମିଟୁ ଗୁନଚା ମୁସା ।।

କାହି ଗଲା

କେନ୍ ନ ଗୁପି ଗଲା

ଆରୁ ଆମକୁ କରିଛେ ଏକଲା

ଆମକୁ କରିଛେ ଏକଲା ।।

ମୁରଲୀ ଶିକା

କୁୁତୁର୍ଲା,ଲରମ୍ଭା

ପାଟଣାଗଡ଼,ବଲାଙ୍ଗିର