ଜୟ ମାଆ ଦୁର୍ଗା

ଶରତ ଆସିଛି ଏ ଧରା ଧାମକୁ

 ପ୍ରକୃତିର ଶୋଭା ନେଇ

କାଶତଣ୍ଡି ନାଚେ ବିଲ ପ୍ରାନ୍ତରରେ

 ପାର୍ବଣର ବାସ୍ନା ପାଇ ।

ଘଣ୍ଟ ହୁଳହୁଳି ମୃଦଙ୍ଗ କାହାଳୀ

  ଶୁଭେ ଆଜି ଚଉଦିଗେ

ମାତା ଦଶଭୁଜା ଆବାହନେ ଆଜି

  ଆନନ୍ଦରେ ମନ ଜାଗେ ।

ତୁମ ଆଗମନେ ହସିଉଠେ ଧରା

  ସହର ଓ ପଲ୍ଲୀପୁର

ଆନନ୍ଦ ଉଲ୍ଲାସ ଖେଳିଯାଏ ମନେ

  ଦୁଃଖ ହୋଇଯାଏ ଦୂର ।

ଏ ଧରିତ୍ରୀ ଆଜି ଶ୍ରୀହୀନ ଦିଶୁଛି

  କରୋନା କରିଛି ଗ୍ରାସ

ମାତା ଆଦିଶକ୍ତି ଦୁଃଖ ଦୂରକରି

  ଫୁଟାଅ ମନରେ ହସ ।

ହେ ସଙ୍କଟହାରିଣୀ ଦୁର୍ଗତିନାଶିନୀ

  ଶକ୍ତିରୂପୀ ନାରାୟଣୀ

ଜାତିଗୋତ୍ର ଭୁଲି ସଭିଙ୍କ ହୃଦୟେ

  ବିଜେ ହୁଅ ଠାକୁରାଣୀ ।

ଏ ସାରା ସଂସାରୁ ଦୁଃଖ ଦୂରକରି

  ବରଷାଅ କୃପା ବୃଷ୍ଟି

ତୁମ ପାଦେ ମୋର ଏତିକି ମିନତି

  ରଖ ସଦା ଶୁଭଦୃଷ୍ଟି ।

ମାନବ ତ ଆଜି ଦାନବ ସାଜିଛି

 କରେ ନାରୀ ଅତ୍ୟାଚାର

ନାରୀ ରକ୍ତେ ପାପୀ ହୋଲି ଖେଳୁଅଛି

  ବଢୁଛି ପାପର ଭାର ।

 ଦୁର୍ଗତି ନାଶିନୀ ମହିଷା ମର୍ଦ୍ଦିନୀ

  ପାପୀ ଙ୍କୁ କର ସଂହାର

କରୁଣାର ବର୍ଷା ବରଷିଯାଉ ମାଆ

  ଜଗତ ହେଉ ଉଦ୍ଧାର ।

ଯାହା ମୁଁ ପାଇଛି ସବୁ ତୁମ ଦାନ

  ଆଉ କିଛି ମାଗୁ ନାହିଁ

ମାଗୁଅଛି ମୁହିଁ ତୁମ ଆଶୀର୍ବାଦ

  ଜଗତ ଉଦ୍ଧାର ପାଇଁ ।