ଗୀତରେ ସମ୍ପର୍କ

 ଗୀତ ମୋର ପ୍ରାଣ ଗୀତ ମୋ ଜୀବନ

 ଗୀତ ମୋର ଗତି ମୁକ୍ତି

 ନୂଆ ଗୀତଟିଏ ଲେଖିଦେଲାପରେ

 ମିଳଇ ସରଗ ଶାନ୍ତି ।

 ଚଉଦିଗେ ମୋର ଯାହା ମୁଁ ଦେଖଇ

 ହୃଦୟ ଝରକା ଦେଇ

 ସେହି ଭାବ ସେହି ଅନୁଭବ ସବୁ

 ଗୀତଟିଏ ଯାଏ ହୋଇ ।

 ସାରା ଜୀବନର ଅଭୁଲା ସ୍ମୃତିକୁ

 ଗୀତରେ ସାଇତି ରଖେ

 ବେଳ ଅବେଳରେ ସେହି ଗୀତରେ ମୁଁ

 ନିଜକୁ ନିରିଖି ଦେଖେ ।

 ଛନ୍ଦାପୟରରେ ଭକ୍ତି ଅର୍ଘ୍ୟ ଢାଳେ

 ଭାବରେ ଶବଦ ଛନ୍ଦି

 ପ୍ରେମର କାହାଣୀ ବଖାଣେ କେବେ ମୁଁ

ମନରେ ମନକୁ ବାନ୍ଧି ।

 ଶିଶୁ ମନ ନେଇ ଶିଶୁର ଭାଷାରେ

 ଶିଶୁ ପାଇଁ ଲେଖେ ଗୀତ

 ସହଜ ସରଳ ଛଳଛଳ ହୋଇ

 ଶିଶୁ ସାଥେ ବସେ ମିତ ।

 କେବେ ମୋର ଗୀତ ଦୁନିଆ କୁ ବାଣ୍ଟେ

 ସଚେତନତାର ବାର୍ତ୍ତା

 ସଜାଗ ହେବାକୁ ସ୍ୱଚ୍ଛ ରହିବାକୁ

 ସୁସ୍ଥ ରହିବାର କଥା ।

 ଦେଶପ୍ରେମ ବହ୍ନି ଜଳାଇବା ପାଇଁ

 ଲେଖିଛି ବନ୍ଦନା କେତେ

 ଗାୟକ ଗାୟିକା ଗାଇଲେ ମୋ ଗୀତ

 ସ୍ୱର୍ଗ ସୁଖ ମିଳେ ମୋତେ ।

 ଚାକାଆଖିଆଙ୍କୁ ଏତିକି ପ୍ରାର୍ଥନା

 ବୁଜିବା ଯାଏ ମୁଁ ଆଖି

 ତାଙ୍କ କରୁଣା ରୁ ଗୀତ ପଦେପଦେ

 ନିତି ପାରୁଥିବି ଲେଖି ।