ଘୋଷ ଯାତରା

ବଡ ଦାଣ୍ଡେ ବଡ଼ ଭିଡ଼ ଲାଗିଅଛି 

କାଳିଆ ଯାତରା ପାଇଁ 

ଧାଇଁ ଆସିଛନ୍ତି କାହିଁ କେତେ ଦୂରୁ

ଜଗାକୁ ଦେଖିବା ପାଇଁ ll

ବଡ଼ ଦେଉଳକୁ ଛାଡି ବଡ଼ଦାଣ୍ଡେ

ବସିବୁ ତୁ ନନ୍ଦିଘୋଷେ 

ଭାଇ ଭଉଣୀଙ୍କୁ ସାଥି ନେଇଯିବୁ

ମିଳିବୁ ଗୁଣ୍ଡିଚା ବାସେ ll

କାଶୀ ବିଶ୍ୱନାଥ ବାଇଶି ପାହାଚେ

ଦରଶନ ପାଇଁ ବସି  

ତୋତେ ଥରେ ଦେଖିବାକୁ ଚାହିଁଚାହିଁ

ପାଷାଣ ହେଲେଣି ଆସି ll

ବଡ ଦେଉଳରୁ ବଡ଼ ଦାଣ୍ଡ ଯିବୁ

ଦାରୁ ବ୍ରହ୍ମ ଝୁଲି ଝୁଲି 

ମୁଣ୍ଡରେ ବାନ୍ଧିକି ସୁନ୍ଦର ଟାହିଆ

ଝୁମୁରୁ ଝୁମୁରୁ ଚାଲି ll

ବଡ ଦାଣ୍ଡେ ତୋର ଦଶ ଅବତାର 

ଲୀଳାକୁ ରଚିବା ପାଇଁ 

ରଥରେ ବାମନ ରୁପକୁ ଦେଖିକି 

ମୁକତି ଲଭିବା ଯାଇ ll

କଳା ମୁଖ କଳା କଳିଆ ଠାକୁର

ନନ୍ଦିଘୋଷେ ବିଜେ ହେଲେ 

ସୁଭଦ୍ରାଙ୍କ ସଙ୍ଗେ ତାଳଧ୍ଵଜ ରଥେ

ବଳଭଦ୍ର ବିଜେ କଲେ ll

ରାଜା ଆସି ତୁମ ଚଣ୍ଡାଳ ସାଜିବେ

ରଥକୁ ଓଳେଇ ଦେଇ 

ଚାରିପାଖେ ଛେରା ପହଁରା କରିବେ 

ସୁନା ଖଡ଼ିକାକୁ ନେଇ ll

ରଥେ ବନ୍ଧା ହେବ ବିରାଟ ଦଉଡି

ଭକତ ଭିଡ଼ିବା ଲାଗି 

ଦଉଡି ଛୁଇଁଲେ ପାପ ଧୋଇଯାଏ

କୋଟିଏ ପୂଣ୍ୟର ଭାଗୀ ll

ଖୁଣ୍ଟିଆ ଡାକୁଛି ହୋଓ ଭକତେ ହୋ

ରଥ ଚକ ଯାଉ ଗଡି 

ଧଳା କଳା ଘୋଡେ ଚଢି ମହାବାହୁ

ପଣ୍ଡା ହାତେ ଗୌରୀ ବାଡ଼ି ll

ଲୀଳା ସମାପନ କରି ରଥ ଚାଲେ

ବଡଦାଣ୍ଡେ ଭକ୍ତ ଭୋଳ 

ଦୟଣା ଚନ୍ଦନ ଅଗୁରୁ କସ୍ତୁରୀ

ମଥାରେ ତୁଳସୀ ମାଳ ll

ଗୁଣ୍ଡିଚା ରାଣୀର ଗୁଣ୍ଡିଚା ମନ୍ଦିର

ଅଭିମୁଖେ ଆଜି ଯାତରା 

ରଥେ ବିଜେ ଆଜି ଚତୁର୍ଦ୍ଧା ମୂରତି

ପୋଡ଼ ପିଠା ପାଇଁ କାତରା ll

ଆସରେ ଭକତ କଳିଆ ସାଆନ୍ତ

ଦେଉଳୁ ହୋଇଲେ ବାହାର 

ଶିରୀକ୍ଷେତରରେ କଳିଆ ଆଗରେ

ଦୁଃଖ ଜଣା ଯିଏ ଯାହାର ll

ବହୁତ ଦିନରେ ଆସିଛି କଳିଆ

ଭେଟିବାକୁ ଭକତଙ୍କୁ 

ଯେଉଁ ଭକ୍ତମାନେ ଦେଉଳେ ନଯାନ୍ତି

କଳିଆ ଭେଟିବ ତାଙ୍କୁ ll