ଏକାଠି ଜୀଇଁବା ଏକାଠି ମରିବା

ପ୍ରୀତିର ସଉଧେ ଗାଇ ପ୍ରେମ ଗୀତି

ନିତି ମଜ୍ଜି ହଜିଯିବା

ଏକାଠି ଜୀଇଁବା ଏକାଠି ମରିବା

ସପଥ ପୂରା କରିବା ।

ମନ ବିଭବରେ ସଜାଇ ରଖିବା

ଆମ ସୁଖଦୁଃଖ ଘର

ଯେତେ ଝଡ଼ଝଞ୍ଜା ଆସିଲେ ଜୀବନେ

ହେବାନି କେବେ କାତର ।

ସମୟର ଦାସ ପରା ଏ ମଣିଷ

ବୁଝିଥିବ ଦୁଇ ମନ

ଅନୁକୂଳେ ହେଉ ଅବା ପ୍ରତିକୂଳେ

ଗତି ସବୁଠି ସମାନ ।

ପ୍ରତିଟି କରମ ଉତ୍ତମ ବିଚାରେ

ସାଧୁଥିବା ମିଳିମିଶି

ବିଶ୍ବାସ ଭରସା ଦୃଢ଼ ପ୍ରାଚୀରରେ

ଆଶା ଖେଳୁଥିବ ହସି ।

ଊଣା କି ଅଧିକ କାହାର ବି ଭାଗ

ନଥିବ ଜୀବନ କ୍ଷେତେ

ସମ ଭାବେ ବାଣ୍ଟି ନେଉଥିବା ଆମେ

ନିଜ ନିଜ ପ୍ରାପ୍ୟ ଯେତେ ।

ଜନ୍ମ ସିନା ଭିନ୍ନ ଜୀଇଁବା ମରିବା

ଏକାଠି ହେବା କାମନା

ମନ ତଳେ ରଖି ନିତି କରୁଥିବା

ବିଭୁ ପଦେ ବନ୍ଦାପନା ।

ଛୁଇଁ ପାରିବନି କଳୁଷକାଳିମା

ହୃଦୟ ଥିବ ପାବନ

ସତପଥେ ରହି ସତ କର୍ମ କରି

ଅମୃତମୟ ଜୀବନ ।