ଚିହ୍ନା ଅଚିହ୍ନା

କାହା ସଙ୍ଗେ ହସଖୁସି ବାଣ୍ଟିବା ତ

ଆଜିକାଲି ଭାରି କଷ୍ଟ

ମୁହଁ ଦେଖିବାକୁ ମଉକା ମିଳୁନି

ମୁଖା ଉଗାଳୁଛି ବାଟ ।

 ହସୁଛ କି ତୁମେ ରୁସିଛ କି ତୁମେ

 ମୁହଁରୁ ହେଉନି ଜାଣି

  ରାଗ ଅଭିମାନ ଲୁଚିଯାଏ ସବୁ

  ମୁଖା ଦିଏ ଗାର ଟାଣି ।

  ମୁଖା ତଳେ ଲୁଚେ ପରିଚୟ ଆଜି

  ହୃଦୟ ହେଉଛି ପାଣି 

  କିଏ ସେ ଅଚିହ୍ନା କିଏ ପୁଣି ଚିହ୍ନା

  ପାଖରୁ ହେଉନି ଚିହ୍ନି ।

  ଅଚିହ୍ନା ଲୋକଙ୍କୁ ପଚାରୁଛି କିଏ

  ଚିହ୍ନା ଲୋକଙ୍କୁ ବି ଡର

  ରୋଗ ବାହକଙ୍କୁ ଚିହ୍ନିବା ଆଗରୁ

  ରୋଗ କରେ ହରବର ।

  ଚିହ୍ନା ହେଉ ଅବା ଅଚିହ୍ନା ଲୋକଙ୍କୁ

  ଏରୁଣ୍ଡି ଛୁଇଁବା ମନା

   ସାମାଜିକ ପ୍ରାଣୀ ଆନମନା ହୁଏ

   ମାନି ଏବେ କଟକଣା ।

  ଚିହ୍ନା ଅଚିହ୍ନାର ଗହଳି ଭିତରେ

  ମଣିଷ ପଣିଆ ହଜେ

  କରୋନା ଡରରେ ସନ୍ଦେହ ଘେରରେ

   ପ୍ରେମ ସାଥେ ପ୍ରୀତି ଯୁଝେ ।