ବିଲେଇ ବେକରେ ଘଣ୍ଟି

ବିଲେଇର ଆତଙ୍କରେ ହୋଇ ଦବଦବା l

ମୂଷା ମାନଙ୍କର ଦିନେ ବସି ଗଲା ସଭା ll

ସଭାପତି ଉଠି କହେ ଶୁଣ ଭାଇ ମାନେ l

ସହି ହେବନାହିଁ ବିଲେଇକୁ ଦେବା ପାନେ ll

ଏ ପାଇଁ ଉପାୟ ତୁମ୍ଭେମାନେ ସ୍ଥିର କର l

ନୋହିଲେ ବଂଶ ଆମ୍ଭର ବୁଡ଼ିଲା ଏଥର ll

ଯୁବ,ବୃଦ୍ଧ,ଡେଙ୍ଗା,ଗେଡ଼ା,କ୍ଷୁଦ୍ର,ବଡ଼ ଥାଇ l

ମୂଷାଙ୍କର ସଭା କ୍ଷିପ୍ରେ ଚାଲିଛି ଆଗେଇ ll

କେ ବୋଲଇ ବିଲେଇକୁ ବସାଇବା ଫାଶ l

କେ କହି ବିରାଡ଼ି ରାବିଡ଼ିରେ ଦେବା ବିଷ ll

ଏ ଭାବେ ଏକୁ ଆରେକ ପ୍ରସ୍ତାବ ଆସିଲା l

ଗରିଷ୍ଠ ଭୋଟରେ ସବୁ କାଟ ଖାଇଗଲା ll

ଚଲାଖିଆ ମୂଷା ଗୋଟେ ପ୍ରତ୍ୟୁତ୍ପନ୍ନମତି l

ପ୍ରସ୍ତାବ ଗୋଟିଏ ଦେଲା ଧଡ଼ପଡ଼ ଉଠି ll

ସଭାଜନମାନେ ମୋର ପ୍ରସ୍ତାବ ଘେନିବା l

ବିଲେଇ ବେକରେ ଘଣ୍ଟିଟିଏ ବାନ୍ଧିଦେବା ll

ଘଣ୍ଟା ଶବ୍ଦୁ ଜାଣିଯିବା ଆସିଲା ବିଲେଇ l

ଦଉଡ଼ି ଦଉଡ଼ି ସର୍ବେ ଯିବାରେ ପଳାଇ ll

ତାଳିମାଡ଼େ ସଭାସ୍ଥଳି ପଡ଼ୁଥିଲା ଫାଟି l

ବୃଦ୍ଧମୂଷା ଗୋଟେ ତହୁଁ କହିଲାକ ଉଠି ll

ଉତ୍ତମ ପ୍ରସ୍ତାବ ନିଶ୍ଚେ ଶୁଣ ଏକେ ଏକେ l

କିଏ ଯିବ ଘଣ୍ଟିବାନ୍ଧି ବିଲେଇର ବେକେ ll

ଏ ସମୟେ ଶୁଣାଗଲା ବିଲେଇର ମ୍ୟାଉଁ l

ବାଟ ନପାଇଲେ ମୂଷା ପଳାଉଁ ପଳାଉଁ ll

ଅସମ୍ଭବ କଥା ଘେନି ଖାଅ ନାହିଁ ଲଡ଼ୁ l

ମୂଷାଙ୍କ ବିଚାର ପ୍ରାୟ ପ୍ରମାଦ ନ ପଡ଼ୁ ll