ଅତିଥି

ଶୀତ ଯେବେ ଆସେ ଚିଲିକା ପାଲଟେ

ପକ୍ଷୀଙ୍କର ଚରା ଭୂଇଁ

ବିଦେଶୀ ଅତିଥି କଳରବରେ ତ

ଚଉଦିଗ ଉଛୁଳଇ ।

କାହିଁ କେତେ ଦୂରୁ ଆସନ୍ତି ସେମାନେ

ନଳବଣ ଖୋଜିଖୋଜି

ବାଟକୁ କେମିତି ମନେ ରଖନ୍ତି ସେ

ଯାଆନ୍ତିନି କାହିଁ ହଜି !

ଦିଗନ୍ତ ବିସ୍ତାରି ଚିଲିକା ଛାତିରେ

ପକ୍ଷୀଙ୍କର ସେହି ଠାଣି

ଦେଶ ବିଦେଶର ଦେଖେଣାହାରୀଙ୍କ

ମନ ନେଇଥାଏ କିଣି ।

ସେଥିପାଇଁ ଯେବେ ଶୀତ ମାସ ଆସେ

ଚିଲିକାରେ ଭିଡ ଭାରି

ମାଳମାଳ ଡଙ୍ଗା ନଳବଣ ଯାଏ

ଦେଖେଣାହାରୀଙ୍କୁ ଧରି ।

ଦଳଦଳ ହୋଇ ଜାତିଜାତି ପକ୍ଷୀ 

ପାଣିରେ ଖେଳନ୍ତି ଖେଳ

ଡଙ୍ଗା ହେଲେ ପାଖ ଉଡି ଯାଆନ୍ତି ସେ

ହୋଇ ସବୁ ଦଳଦଳ ।

ଭାସିବା ତାଙ୍କର ଉଡିବା ତାଙ୍କର

ସବୁ ତ ସୁନ୍ଦର ଲାଗେ

ଆଖି ଯାଏ ଲାଖି ସେ ଶୋଭାକୁ ଦେଖି

ମନରେ ଆନନ୍ଦ ଜାଗେ ।

ଶୀତ ଚାଲିଗଲେ ଆରମ୍ଭ ହୁଅଇ

ପକ୍ଷୀଙ୍କ ବାହୁଡା ବେଳ

ଝୁରଇ ଚିଲିକା ଝୁରେ ନଳବଣ

ଗିରିଷମ ହୁଏ କାଳ ।

ବିଦେଶର ସେହି ପକ୍ଷୀଙ୍କ ପାଇଁ କି

ଚିଲିକା ଜଗତେ ଖ୍ୟାତ

ପକ୍ଷୀ ନୁହନ୍ତି ସେ ଅତିଥି ଆମର

ଆମ ପାଇଁ ଗର୍ବ ସେତ ।