ଆମ ଗାଁ ହାଟ

  

  ରବିବାର ହାଟପାଳି 

  ତୋଟା ପଡେ ଉଛୁଳି

  ବେପାରୀ ଙ୍କ ଭିଡ ଜମେ

  ଗରାଖଙ୍କ ଗହଳି ।

  ପିଣ୍ଡି ଅଛି ଯାହାର ସେ

  ପାଲ ଟାଣି ବସନ୍ତି

  ବାକି ସବୁ ପାଲି ପାରି

  ପସରା ତ ମେଲନ୍ତି ।

  ଘର ପାଇଁ ଯାହା ଲୋଡା

  ସବୁ ମିଳେ ସେଇଠି

  ହୁଡିଗଲେ ହାଟପାଳି

  ହନ୍ତସନ୍ତ ଖାଉଟି ।

  ସଉଦା ମିଳଇ ମିଳେ

  ଲୁଗା, କ°ସାବାସନ

  ପରିବା ଗଦାକୁ ଦେଖି

  ମନ ହୁଏ ଉଛ୍ଛନ ।

  କ୍ଷେତରୁ ପରିବା ତୋଳି

  ଚାଷୀମାନେ ଆସନ୍ତି

  ବଜାର ଭାଉଠୁ ଅଧା

  ଦରରେ ସେ ବିକନ୍ତି ।

  ବାହାର ବେପାରୀ ଆସି

  ପରିବା ତ କିଣନ୍ତି

  ସହରକୁ ନେଇ ସବୁ 

  ଚଢାଦରେ ବିକନ୍ତି ।

  ସହରରୁ ଫେରିବାଲା

  ଯେତେସବୁ ଆସନ୍ତି

  ମାଇକିରେ ଡାକିଡାକି

  ଦରବ ସେ ବିକନ୍ତି ।

  ଦିନସାରା କିଣାବିକା

  ଲାଗିଥାଏ ଗହଳ 

  ହାଟ ସାରା ବୁଲିଗଲେ

  ମନ ହୁଏ ପ୍ରଫୁଲ ।

  ସାଙ୍ଗସାଥୀ ସାଥେ ଏଠି

  ହୁଏ ଯେବେ ଦେଖାରେ

  ଜଳଖିଆ ଖିଆପିଆ

  ଜମେ ଗପସପରେ ।

  ହାଟରେ ମିଳଇ ଆମ

  ଭଲ ଛେନା ତାଡିଆ

  ରଘୁ ସାହୁ ରସଗୋଲା

  ଲାଗେ ଭାରି ବଢିଆ ।

  ସହରୀ ଖାଦ୍ୟ ବି ଏବେ

  ହାଟେ ଆମ ମିଳୁଛି

  ଚାଟ୍ , ଚାଓମିନ୍ ,ରୋଲ୍

  ଗୁପୁଚୁପ୍ ଭାଷୁଛି ।

  ବଜାର ସଭ୍ୟତା ଏବେ

  ଗାଁ କୁ ତ ଗଲାଣି

  ହାଟ ର ନିଆରା ବାସ୍ନା

  ଗାଁ ଆମ ଭୁଲିନି ।