शोध स्वत:चा

मी जन्मताच तयार झाले नाते

आईची मी होते सोनुली

अन् बाबांची छकुली

आजी, आजोबांची मी नात होते

तर कोणाची पुतणी, भाची असे नाते

शाळेत गुरुजींची शिष्या होते

अन् वर्गातल्या मुलामुलींची

वर्गमैत्रीण होते

लग्नानंतर मी

माझ्या नवऱ्याची बायको झाले

सासू सासऱ्यांची सून, तर

नणंद, दिराची वहिनी झाले

कोणाची मामी तर

कोणाची काकी झाले

नंतर मुलांची आई झाले

पुढे सुनांची, जावयांची सासू झाले

त्यांच्या मुलांची आजी झाले

या सर्व नात्यांमध्ये मात्र

मी कोण आहे हे

मलाच मी शोधीत राहिले

मलाच मी शोधीत राहिले.